Balada Kavasakı sındromy baryn qalaı anyqtaýǵa bolady – dáriger keńesi

ALMATY. QazAqparat - Almaty qalalyq balalar klınıkalyq aýrýhanasynyń gematologııa bóliminiń meńgerýshisi Uljalǵas Óskenbaeva «QazAqparat» HAA tilshisine Kavasakı sındromyn qalaı anyqtaýǵa bolatynyn jáne osyndaı sırek kezdesetin aýrýdyń alǵashqy belgilerinde ne isteý kerektigin aıtyp berdi.

Dárigerdiń sózinshe, COVID-19 uqsaıtyn aýrý kópjúıeli qabyný sındromy dep atalady.

«Kavasakı sındromy sáýir aıynda paıda boldy. Bul balalardyń ımmýndyq júıesiniń qabynýynan bolǵan. Kavasakı sındromy - bul tamyrǵa áser etetin júıelik aýrý. Ásirese, ortasha jáne kishi dıametrli arterııalarǵa áser etedi. Negizinde kavasakı sındromy kishkentaı balalarda jıi kezdesedi. Alaıda arakidik eresekterde de baıqalady. Aýrýdyń etıologııasy vırýstar, genetıkalyq beıimdilik jáne aýtoımmýndyq mehanızm. Desekte, bul aýrýdyń patogenezi tolyq zerttelmegen.

Onyń belgilerine keler bolsaq, dene qyzýynyń kóterilýi, jótel, qan qysymynyń tómendeýi, ishek aýrýy, aıaq-qol isinýi múmkin, tynys alý qıyndaıdy, júrek soǵýy jıileıdi»,– deıdi Uljalǵas Óskenbaeva.

Sonymen qatar, ol ata-analardy josparly ekpelerden bas tartpaýǵa shaqyrdy.

«Balalardy túrli vırýstyq ınfektsııadan qorǵaýdyń senimdi joly– vaktsına. Kóptegen profılaktıkalyq egýler vırýstyq ınfektsııalardyń aldyn alýǵa baǵyttalǵan. Sondyqtan ata-analar balalaryn kúntizbege sáıkes ekpe saldyrýy kerek»,– deıdi dáriger.

Sóz arasynda dáriger emdeý tásilin de tilge tıek etti.

«Qazir dene salmaǵynyń ár kılogrammyna 2 gramm ımmýnoglobýlın salyp jatyrmyz. Sondaı-aq, «Aspırın» qoldanylady. Eger baladan joǵaryda atalǵan aýrýdyń belgileri anyqtalyp, dıagnoz qoıylatyn bolsa birden emdi bastaımyz. Bul asqynýlardyń aldyn alady. Barlyq jaǵdaıda aýrýdyń onynshy kúnine deıin koronarlyq arterııalardyń qabynýyn jáne trombtardyń paıda bolýyn boldyrmaý úshin jedel túrde emdeýdi bastaý qajet»,– dedi ol.

Dáriger balalardy adam kóp shoǵyrlanatyn jerge aparmaýǵa keńes berdi.

«Qazir adamdarmen qarym-qatynasty barynsha azaıtý kerek. Eger adam kóp júretin jerge baryp jatsa mindetti túrde maska taǵyp, áleýmettik qashyqtyqty saqtaǵan durys. Odan bólek balany kópshilik oryndarda tamaqtandyrmaı tura turǵan jón. Bastysy, balanyń ımmýnıtetin kóterýge kúsh salý kerek. Durys tamaqtaný qajet», - deıdi spıker.