Balabaqshalardy lıtsenzııalaýda qatal talap bolmaıdy - Aımaǵambetov

NUR-SULTAN. QazAqparat – Balabaqshalardyń 95 paıyzy mektepke deıingi uıymdardy lıtsenzııalaý júıesine qoldaý kórsetip otyr. Bul týraly QR Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Jeke uıymdar qaýymdastyqtarynyń basym kópshiligi bul bastamany qoldaıdy, tolyq qoldaıdy. Jaqynda ǵana Amanat partııasy janyndaǵy komıssııanyń otyrysy ótip, lıtsenzııalaýdy engizý máselesi qaraldy. Menińshe, osy otyrysta mektepke deıingi uıymdardyń qaýymdastyqtary men jekemenshik balabaqshalardyń quryltaıshylarynyń ózderi, memlekettik balabaqshalar bul bastamany qoldap qana qoımaı, memleket osy rásimge jaýapkershilikpen qarap, ony engizýi tıis dep naqty aıtqan bolatyn», - dedi Ashat Aımaǵambetov.

Mınıstr lıtsenzııalaýdy engizý kezinde memlekettik jáne jekemenshik balabaqshalarǵa birdeı talap bolatyndyǵyn basa aıtty.

«Bul jerde táýekelderdi eskerýimiz kerektigi túsinikti. Kezeńdilik, balabaqshalar oryndaı alatyn krıterııler men biliktilik talaptary bolýy kerek. Belgili bir shektes elderde bar krıterıılerdi qoıa almaımyz. Óıtkeni, bizde balalardy mektepke deıingi tárbıemen qamtýdy tómendetpeý mindeti turǵanyn baıqap otyrmyz. Demek, mektepke deıingi uıymnyń ǵımaraty mindetti túrde menshikte bolýy kerek degen máseleni eshkim kótermeıdi. Biraq, endi balalardy terezesi joq, jeldetilmeıtin jertólede tárbıeleýge jol berilmeıdi, ıaǵnı óte qolaıly jaǵdaı jasalady. Degenmen, keıbireýler naryqty ılandyrýǵa tyrysyp júrgenindeı eshqandaı qatal is-sharalar bolmaıdy. Talap aqylǵa qonymdy, saıma-saı jáne qoljetimdi bolady», - dep túsindirdi ol.

Aıta keteıik, búgin Nur-Sultan qalasynda Y.Altynsarın atyndaǵy Ulttyq bilim akademııasynda tamyz konferentsııasy aıasynda «Bilim sapasyn qamtamasyz etýdiń ulttyq júıesi» taqyrybynda paneldik sessııanyń jalpy otyrysy ótip jatyr.

Buǵan deıin mınıstr Bilim alýshylardyń oqý jetistigin monıtorıngileý PISA sııaqty qural bolýy kerektigin aıtty.