Balabaqshalardaǵy kezek: Bıyl 332 mektepke deıingi uıym ashyldy

ASTANA. QazAqparat – Balabaqshaǵa kezekke qoıý men joldama alýǵa arnalǵan Esepke alýdyń biryńǵaı bazasy qurylyp jatyr. Bul týraly elordada ótip jatqan respýblıkalyq tamyz keńesinde atalǵan mınıstrliktiń basshysy Ǵanı Beısembaev aıtty, dep habarlaıdy QazAqparat tilshisi.

«Mektepke deıingi bilim berý salasyndaǵy memlekettik saıasat árbir balaǵa mektepke deıingi sapaly bilim men sanaly tárbıe berýge baǵyttalǵan. 11 myńnan astam mektepke deıingi uıymǵa 1 mln-ǵa jýyq bala barady. 100 myńǵa jýyq pedagog balabaqshalarda tárbıe jáne oqytý máselelerimen aınalysady.

Balabaqshalardaǵy kezek máselesin sheshý úshin jyl basynan beri 32,8 myń oryndyq 332 mektepke deıingi uıym ashylyp, jyl sońyna deıin taǵy 48 myń oryn qosylady», - dedi Ǵ. Beısembaev.

Onyń aıtýynsha, Memleket basshysynyń tapsyrmasy boıynsha balany kezekke qoıý jáne mektepke deıingi uıymdarǵa qabyldaý úshin joldama alýǵa arnalǵan Esepke alýdyń biryńǵaı bazasy qurylyp jatyr.

«Byltyr engizilgen Mektepke deıingi tárbıe men oqytýdyń jańa modeli oń nátıje bere bastady. Jetkinshekterdiń qaýipsizdigi úshin barlyq memlekettik balabaqshalar beınebaqylaýmen jabdyqtalǵan. Memleket basshysynyń tapsyrmasy boıynsha kásibı mamandardy tartý maqsatynda bıyl qyrkúıek aıynan bastap tárbıeshilerdiń jalaqysy 30 paıyzǵa artady jáne bul baǵyttaǵy jumystar áli de jalǵasady», - dedi mınıstr.

Sonymen qatar ol balabaqshanyń ár tárbıeshisi óz qaraýyndaǵy balanyń mektepke daıyn bolyp barýyna jaýapty ekenin atap ótti.