Balabaqshaǵa baratyn 150 myńnan astam bala tegin tamaq ishedi
«Buǵan deıingi negizgi maqsat 3-6 jastaǵy balalardy qamtý bolsa, endi Prezıdent tapsyrmasyna sáıkes 2 jastan bastap qamtý mindeti qoıylyp otyr. Ol úshin balabaqshalarda jańa oryndardy ashý josparda bar. Kelesi jyldyń ózinde bıylmen salystyrǵanda oryn 2,5 esege kóp ashylady. Jan basyna shaqqandaǵy qarjylandyrý tetigi ózgertiledi. Balabaqsha qyzmetiniń sapasyn qamtamasyz etý úshin keshendi is-sharalar qabyldanady. Oryndardy bólýdiń ashyqtyǵyn qamtamasyz etý jáne qaıtalanýdy boldyrmaý úshin balabaqshalarǵa ortalyqtandyrylǵan biryńǵaı kezek engiziledi. Sáıkesinshe bul qyzmetti egov mobıldi qosymshasy men bankterdiń de qosymshalarynan alýǵa bolady», - ded mınıstr.
Onyń atap ótýinshe, áleýmettik osal otbasylardan shyqqan balabaqshaǵa baratyn balalar bıýdjet qarajaty esebinen tegin tamaqpen qamtylady.
«Bul - erekshe mańyzǵa ıe bastama. Nege deseńizder, ata-analar áleýmettik qıyn jaǵdaıyna baılanysty balabaqshadaǵy tamaqqa tóleıtin aqshalary bolmaǵandyqtan, balany kezekke de qoımaıdy, balabaqshaǵa da barmaıdy. Endi Prezıdenttiń tapsyrmasyna sáıkes 150 myńnan astam bala tamaqpen qamtamasyz etiledi. Ol óz kezeginde balanyń odan ári durys damýyna, bolashaǵyna yqpal etedi. Taǵy bir kópshilik kóterip júrgen másele, ol – 1-4-synyptardy tamaqpen qamtamasyz etý. Bul másele Prezıdent baǵdarlamasynda kózdelgen. Osylaısha, taǵy 1 mln-nan astam balaǵa bir mezgil tegin ystyq tamaq beriledi», - dedi Ashat Aımaǵambetov.