Balabaqshadaǵy oqytý júıesinde aýqymdy ózgerister bolady - Aımaǵambetov

ASTANA. QazAqparat – Mektepke deıingi bilim júıesinde aýqymdy ózgerister bolady. Bul týraly Úkimet otyrysynda elimizdegi bilim berýdi damytýdyń 2026 jylǵa deıingi tujyrymdamasyn talqylaý kezinde Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Tujyrymdamada strategııalyq jáne baǵdarlamalyq qujattarda belgilengen basymdyqtar, Memleket basshysynyń tapsyrmalary tolyq qamtyldy. Biz túrli halyqaralyq zertteýlerdiń, taldaýlardyń nátıjelerin eskerip, sarapshylar men pedagog qaýymdastyqtarymen barlyq máseleni talqyladyq. Quzyretimiz boıynsha 6 baǵyt 17 ındıkator jáne 109 is-shara kózdelgen», - dedi A. Aımaǵambetov.

Osy oraıda ol balalardy erte damytý baǵytyna toqtaldy.

«Bilim salasynyń eń mańyzdy deńgeıi – ol balabaqsha. Zertteýlerge sáıkes balanyń ıntellektýaldy, áleýmettik, emotsııalyq damýynda balabaqshalardyń áseri zor. Sol sebepti balalardy erte damytýdyń jańa modeli engizilip jatyr. Baǵdarlama da, oqytý ádisteri de túbegeıli ózgerip otyr. Bul Táýelsizdik jyldarynda mektepke deıingi bilim júıesindegi eń úlken ózgeristiń biri ekenin atap ótken jón», - dedi mınıstr.

Onyń paıymynsha, bunyń aldyndaǵy baǵdarlama tym akademııalyq boldy.

«ıAǵnı 3-4 jasar balany otyrǵyzyp qoıyp, 20 mınýtten oqytsaq, endi halyqaralyq zertteýler aıasynda tárbıe men oqytý balalardyń jas erekshelikterine sáıkes oıyn arqyly júrgiziledi. Oıyn – balanyń jany men tánine saı keletin tabıǵı áreket. Bala sol arqyly qorshaǵan álemdi zerttep, ony tanı otyryp, qajetti daǵdylaryn damytady. Osy oraıda balanyń tutas damýy úshin barlyq jaǵdaılar qarastyrylady. Balalar kommýnıkatıvti, ózine senimdi, qıyndyqtarǵa tózimdi, denderi saý, ashyq jáne kreatıvti oılaıtyn, sondaı-aq otansúıgishtik, eńbekqorlyq pen bilimge qushtarlyq qundylyqtaryn boıyna sińirip balabaqshadan tárbıelenip shyǵatyn bolady», - dedi vedomstvo basshysy.