Balabaqshada búldirshinderdi urǵan shardaralyq tárbıeshiniń isi polıtsııaǵa ótti
Áleýmettik jelide balabaqsha tárbıeshisi balany aıaýsyz uryp jatqany jóninde vıdeo tarady.
Onda áıel kisiniń bir balanyń qolynan ustap, basynan toqtamaı urǵany vıdeoǵa túsip qalǵan.
Sondaı-aq, eki qyzdy bir birimen urystyrýǵa áreket etken. Balalarǵa dórekilik tanytyp, daýys kóterip urysqan.
Áleýmettik jelide taraǵan atalǵan jaǵdaı kópshiliktiń ashýyn týǵyzdy. Al, Túrkistan oblystyq adamı áleýetti damytý basqarmasy istiń polıtsııaǵa ótkizilgenin aıtty.
«Túrkistan oblysy Shardara aýdanynyń adamı áleýetti damytý bólimi arnaıy komıssııa tobyn quryp, zerdeleý jumysyn júrgizdi. Nátıjesinde balany urǵan jekemenshik balabaqsha tárbıeshisi ekeni belgili boldy. Tıisti jumysty júrgizýge yqpal jasaý jóninde Shardara aýdandyq polıtsııa bólimine hat joldandy. Búgingi tańda aldyn ala anyqtaý-tergeý amaldary júrgizilip jatyr» delingen Túrkistan oblystyq adamı áleýetti damytý basqarmasy bergen aqparatta.
Al, Túrkistan oblystyq polıtsııa departamentiniń baspasóz qyzmeti balabaqsha tárbıeshisinen «eshqaıda ketpeıtini» jóninde qolhat alynǵanyn jetkizdi.
Qazirgi tańda Shardara aýdandyq polıtsııa bóliminiń tártip saqshylary oqıǵanyń tolyq mán-jaıyn anyqtap jatyr.