Balabaqsha tárbıeshileriniń jalaqysy 1 qyrkúıekten bastap 30 paıyzǵa ósedi

ASTANA. QazAqparat - Oqý-aǵartý mınıstrliginiń mektepke deıingi bilim departamentiniń habarlaýynsha, memleket basshysynyń tapsyrmasymen 2020 jyldyń qańtarynan 2023 jyldyń qańtaryna deıin tárbıeshilerdiń jalaqysy jyl saıyn 25%-ǵa ósti. 2023 jylǵy 1 qyrkúıekten bastap taǵy 30%-ǵa ósedi. Osylaı, elimizdegi 97 myńnan astam pedagogtiń jalaqysy 2,5 esege artady, dep habarlaıdy QazAqparat.

«Memleket basshysynyń qoldaýynyń arqasynda júzege asyrylatyn pedagogterdiń jalaqysyn jyl saıyn arttyrý oń nátıje berdi. Mektepke deıingi bilim berý júıesiniń kadrlyq áleýetin kúsheıtý maqsatynda olardy daıarlaý, biliktiligin arttyrý jáne attestattaý júıesin jetildirý, áleýmettik mártebesi men jalaqysyn arttyrý boıynsha mınıstrlik júıeli jumys júrgizýde. Mektepke deıingi, orta, tehnıkalyq jáne kásiptik bilim berýdi damytýdyń 2023-2029 jyldarǵa arnalǵan tujyrymdamasy qabyldandy. Ádistemelik kabınetter janynan mektepke deıingi tárbıe men oqytý pedagogterine ádistemelik kómek kórsetý úshin mobıldi toptar quryldy», - deıdi departament dırektory Natalıa Jumadildaeva.

«Mektepke deıingi tárbıe jáne oqytý» baǵyty men mamandyǵy boıynsha kadrlar daıarlaý 39 joǵary oqý orny men 119 kolledjde júzege asyrylady. Kolledjder óńirlik erekshelikterdi eskere otyryp, mektepke deıingi uıymdarmen birge «Pedagog» kásibı standarty negizinde bilim berý baǵdarlamalaryn ázirleıdi jáne oqý baǵdarlamalary men josparlaryn jańartady.

Pedkolledjderge qoıylatyn biliktilik talaptary qaıta qaralyp, bıyl mektepke deıingi bilim berýdiń 20 myńnan astam pedagogi biliktilikti arttyrý kýrstarynan ótedi.