Balabaqsha qyzmetin lıtsenzııalaý 2024 jyly bastalady – mınıstrlik

NUR-SULTAN. QazAqparat – 2024 jyldan bastap Qazaqstanda balabaqshalar qyzmetin lıtsenzııalaý sharasy qolǵa alynady. Bul týraly QR Oqý-aǵartý mınıstrligi bilim jáne ǵylym salasynda sapany qamtamasyz etý komıtetiniń tóraǵasy Gúlzat Kóbenova málim etti, dep habarlaıdy QazAqparat tilshisi.

«Balabaqsha qyzmetin lıtsenzııalaý jańa dúnıe emes. 2011 jylǵa deıin lıtsenzııalaý bolǵan. Sol jyldary mınıstrliktiń aldynda balalardy mektepke deıingi bilim-tárbıe oshaǵymen qamtamasyz etý mindeti turdy. Sol sebepti lıtsenzııalaýdy ýaqytsha alyp tastady. Sodan beri 10 jyl ýaqyttyń ishinde balabaqshamen qamtý maqsaty oryndaldy. Búginde elimiz boıynsha balabaqshamen qamtý kórsetkishi 99 paıyzdy quraıdy. Endigi ýaqytta sapaǵa mán berý kerek. ıAǵnı balabaqshalardyń qanshalyqty zań, talap pen suranysqa saı jumys isteıtini mańyzdy bolyp otyr», - dedi Gúlzat Kóbenova mınıstrliktiń «Oqu-ağartu LIVE» jobasynyń efırinde.

Onyń aıtýynsha, bıyl jáne kelesi jyly balabaqshalardy lıtsenzııalaýǵa daıyndyq jumysy júredi. Al lıtsenzııa berý 2024 jyly bastalmaq.

«Lıtsenzııalaý jumysy kezeń-kezeńimen júredi. Ol eń aldymen jańadan ashylǵan balabaqshalarǵa qatysty. Aıta ketsek, elimizde ortasha eseppen jylyna 200 balabaqsha ashylady. Ekinshiden, memlekettik attestatsııadan ótpegen balabaqshalar lıtsenzııalanady. Statıstıkaǵa súıensek, memlekettik attestıtsııadan 2 ret ótpeı qalǵan balabaqshalardyń úlesi 1-2 paıyzdy qurap otyr. Úshinshi kezeńde qyzmeti boıynsha táýekel jáne kúmán týdyratyn balabaqshalar lıtsenzııalanady», - deıdi ol.

Sondaı-aq, komıtet basshysy bilim berý uıymdarynyń qyzmetin lıtsenzııalaý mektep jáne kolledjderde bar ekenin eske saldy.

Buǵan deıin QR Oqý-aǵartý mınıstri Ashat Aımaǵambetov balabaqshalardy lıtsenzııalaý protsesin túsindirip bergen edi.

Eske sala ketsek, Úkimettiń keńeıtilgen otyrysynda Memleket basshysy Qasym-Jomart Toqaev jekemenshik balabaqshalardy lıtsenzııalaý tártibi qaıta engiziletinin aıtty.