Balabaqsha kezeginde dárigerlerdiń balalaryna basymdyq berilýi múmkin

ASTANA. QazAqparat – Parlament Májilisiniń Áleýmettik-mádenı damý komıtetiniń tóraǵasy Ashat Aımaǵambetov dárigerlerdi kásibı merekesimen quttyqtap, sala mamandaryn qoldaý úshin depýtattar tarapynan atqarylyp jatqan jumystardy málim etti, dep habarlaıdy QazAqparat tilshisi.

«Qurmetti dárigerler men densaýlyq saqtaý salasynyń qyzmetkerleri! Sizderdi kásibı merekelerińizben quttyqtaımyn! Sizderdiń mamandyqtaryńyz eń qıyn, jaýapty jáne asyl mamandyqtardyń biri. Sizder kún saıyn myńdaǵan adamdardyń ómirin saqtap qalyp, naǵyz erlik jasap júrsizder», - dep jazdy depýtat óziniń Telegram arnasynda.

Ashat Aımaǵambetov atap ótkendeı, qazir Májilis depýtattary densaýlyq saqtaý týraly zań jobasyn qarap jatyr. Oǵan saı, medıtsına qyzmetkeriniń mártebesin bekitý, dárigerlerdi áleýmettik qoldaý men quqyqtyq qorǵaý boıynsha qosymsha sharalar qabyldanýy múmkin.

Depýtat málimetine sáıkes, bul maqsatta ózi jetekshilik etetin komıttetiń depýtattary mynadaı birqatar túzetýlerge bastama jasaǵan:

- Aýylǵa jumysqa kelgen medıtsına qyzmetkerleri úshin 10 mln teńge mólsherinde kóterme járdemaqy belgileý jónindegi normany zańǵa engizdik.

- Áleýmettik medıtsınalyq saqtandyrý qoryna óz jarnalaryn tóleıtin barlyq medıtsına jáne bilim berý qyzmetkerleriniń jyl saıynǵy, mindetti medıtsınalyq tekserýden tegin ótýi, ıaǵnı MÁMS esebinen ótýi týraly norma usynyldy;

- Úkimet usynǵan zań jobasynda 2025 jyldan bastap medıtsına qyzmetkerleriniń ózderi kásiptik jaýapkershilikti saqtandyrý boıynsha jyl saıynǵy saqtandyrý aqylarynyń 50%-yn tóleýge mindetteý kózdelgen. Biz 100% saqtandyrýdyń barlyq somasyn jumys berýshiniń esebinen jabýdy usynyp otyrmyz;

- Medıtsına qyzmetkerleriniń mártebesin arttyrý úshin dárigerlerdiń balalaryn balabaqshaǵa basym tártippen qamtamasyz etý, demalystyń merzimin ulǵaıtý jónindegi normalar usynylýda. Sondaı-aq, ózderiniń kásibı mindetterin atqarý kezinde qaıtys bolǵan nemese múgedek bolǵan medıtsına qyzmetkerleriniń balalary úshin joǵary bilim berý granttaryn bólý kezinde basym quqyqty belgileý bóliginde túzetý engizildi;

- Medıtsına qyzmetkerlerin quqyqtyq qorǵaý jónindegi norma jáne dárigerlerdi qorǵaýǵa baǵyttalǵan basqa da normalar usynylyp otyr.

Ashat Aımaǵambetovtyń málimdeýinshe, búginde bul túzetýler Úkimettiń qaraýyna jiberilgen.