Bala týýdan rekord ornatsaq, oǵan balabaqsha men mektep daıyn ba – Aıdos Sarym
«Pandemııa kezinde «bebı-býmnyń» jańa rekordyn ornattyq dep jatyrmyz. Oǵan balabaqqsha men mektep daıyn ba? Byltyr 425 myń bala dúnıege kelipti. Oǵan bıyldyń jarty jylyn qosyp 1 mln náreste dep alsaq. Ol 1 mln balaǵa 2 jyldan soń, balabaqsha kerek, 6 jyldan soń mektep kerek. Osyny eskergen Prezıdent 1000 mektep máselesin búginnen kóterip otyr. Sharýa mektep salýmen bitpeıdi, oǵan kadr kerek, ony daıyndaý bólek áńgime. Elordanyń ózinde 1 myńǵa jýyq pedagog tapshy eken. Kózdi ashyp-jumǵansha ol balalarǵa joǵary bilim alý kerek bolady, odan ári olar elimizdiń eńbek naryǵyna qatysady. Osy turǵyda memleket 1 mln balany bilim jáne jumyspen qamtýǵa daıyn ba degen suraq týyndaıdy»- dedi Aıdos Sarym QR Sybaılas jemqorlyqqa qarsy is-qımyl agenttiginde ótken «Antikor Live» jobasynyń efırinde.
Onyń aıtýynsha, elimizde álemdik dárejede bilim beretin oqý ordalary az.
«Sondyqtan Joldaýdaǵy tapsyrmadan bólek, qoǵam bilim berý máselesimen shynaıy aınalysýy qajet. Joldaýdaǵy maǵan taǵy bir unaǵan sát, úlken, mega jobalardan bas tartýymyz. Qarap otsańyz, Joldaýdyń ishinde úzdik 30-qa, 10-qa kiremiz, álemdi basqaramyz, qutqaramyz degen áńgime joq. Bizdiń mindet 19 mln halqymyzdyń qamy, sonyń bolashaǵy men baı-qýaty. Jáne bir aıtyp ótetin sát, Prezıdent ár tapsyrmasyna jaýapty naqty adamnyń bolýy», - deıdi ol.
Buǵan deıin Májilis depýtaty bıylǵy Joldaýǵa qatysty Prezıdent haıp qýǵandarǵa jaýap berdi degen edi.