«Bala taǵdyrynan reıtıng qymbat bolǵany ma?» - respýblıkalyq basylymdarǵa sholý

ASTANA. 31 mamyr. QazAqparat - Qazaq aqparat agenttigi respýblıkalyq basylymdarda 31 mamyr, beısenbi kúni shyqqan ózekti materıaldarǵa sholýdy usynady.

                                                        ***
31 mamyr - Saıası qýǵyn-súrgin jáne  asharshylyq qurbandaryn eske alý kúni. Eske alyp, alǵa umtylaıyq! Bizdiń halqymyzdyń tarıhy baı da qatparly. Onda uly je­tistikter men jeńister, sondaı-aq qasiret synaqtary men úreıge toly kezeńder az bolǵan joq. Táýel­sizdikke ıe bolǵan búgingi kún bıi­ginen tarıh tereńine kóz jibere oty­ryp, ekonomıkalyq jáne áleý­mettik-saıası damýy jaǵynan álem­dik qaýymdastyqta laıyqty ornyn ıelengen memleket qur­ǵa­ny­myzǵa táýbe deımiz. Búgingi tabys­tarymyzdyń aýqymdy­ly­ǵyn shamalap, halqymyzdyń 30-shy jyl­dardaǵy jaǵdaıynyń qan­shalyqty aýyr bolǵanyn ba­ǵamdaı alamyz. Asharshylyq máselesi boıynsha zertteýshiler tek asharshylyq oqıǵalarymen shektelmeı, ótken ǵasyrdyń ishinde qazaq halqynyń basyna aýyrtpalyq ákelgen túrli oqıǵalardy qamtı otyryp, onyń sebepterin, saldaryn taldap, oı qorytýda. Sonaý, 1930-jyldarda bolǵan surapyl oqıǵalardyń túp­ki mán-jaıyn arnalǵan maqala «Egemen Qazaqstan» basylymynyń búgingi sanynda «Men qazaqpyn, bıikpin, baıtaq elmin, qaıta týdym, ómirge qaıta keldim...»  degen taqyryppen basyldy.

Sondaı-aq osy basylymnyń búgingi sanynda keshe Beıbitshilik jáne ke­lisim saraıynda Álemdik jáne dástúrli dinder kósh­bas­shylarynyń IV sezi ju­my­sy jaıynda aıtylady. Forýmǵa álem­dik dinı konfessııa­lar­dyń, bedeldi halyqaralyq uıymdardyń basshylary, son­daı-aq mádenıetter­ara­lyq únqatysýdy damytý sa­lasyndaǵy qyzmetti júzege asyratyn kórnekti ǵalym­dar men sarapshylar, tanymal qoǵam qaıratkerleri men saıasatkerler qatysýda. Sezge álemniń 40-tan astam elinen 90-ǵa jýyq delegatsııa arnaıy kelip otyr. Forýmnyń plenarlyq otyrysy bastalmas buryn, Álemdik jáne dástúrli dinder kóshbasshy­lary­nyń IV sezi aıasynda Qazaq­stan Respýblıkasynyń Prezı­denti Nursultan Nazarbaevtyń qatysýymen Din kóshbasshylary keńesiniń birinshi otyrysy ótti. Qazaqstan Prezıdenti Keńes mú­sheleri aldynda sóılegen sózinde jańa organdy qurý týraly usy­nys, eń aldymen, qazirgi zamanǵy úderisterdegi din men konfes­sııaaralyq únqatysý róliniń arta túsýine baılanysty ekenin atap ótti. Qazaqtyń uly oıshyly Abaı «Іzgi nıetti iste uıatqa qal­dyratyn eshteńe bolmaıdy» dep jazǵan. Dinder kóshbasshylary keńesiniń maqsaty men mindeti - ıgilikti de ózekti. Biz qazirgi álem­de úndesý, beıbitshilik pen ke­lisim ıdeıasyn bekitý týraly qam jasaýdamyz, dedi Memleket basshysy. Osy aıtýly jıyn jaıynda basylymnyń «Únqatysý arqyly beıbitshilikke úndeý - eń ıgilikti de izgi qadam»atty taqyryptaǵy maqalasynda búge-shúgesine deıin jazylǵan.

                                                 ***

«Aıqyn» basylymynyń jazýynsha, Qazaqstannyń ulttyq palatasy «Atameken» odaǵynyń prezıdıým tóraǵasy Tımýr Qulybaev prezıdıým bıýrosynyń úshinshi keńesinde «elimizdegi jekemenshik sharýashylyq sýbektilerin qoǵamdyq qaýymdastyqqa múshelikke ótýin bıznes ókiliniń qarjylyq jaǵdaıyna baılanysty óz erkimen mindetteý kerek» degen usynys bildirdi. «Múshelikke ótýdi mindetteý-palata sheshiminiń legıtımdiligin qamtamasyz etedi» dep túsindirdi prezıdıým tóraǵasy. Bul másele jóninde keńirek bilgińiz kelse, «Aıqyn» basylymynyń búgingi sanyndaǵy «Atamekenge» ótý mindettelýi tıis» atty maqalany qarańyz.

***

«Bala taǵdyrynan reıtıng qymbat bolǵany ma?»,- dep jazady «Alash aınasy» basylymy búgingi sanynda. Basylymnyń jazýynsha, qoǵam bóliminde: UBT-ǵa daıyndyq naýqanynda oqýshylardyń jaıyn oılap otyrmyz ba degen taqyryptaǵy maqalasynda qazirgi kún tártibinde turǵan mańyzdy másele kóterilgen. Rasynda da, mektepti bitermesten oqýshylardy kúshtep  mektepten alastatý, sol arqyly tek úlgerimi jaqsy balalardy ǵana UBT-ǵa qaldyrý tárizdi qubylys keńinen óris alyp kele jatqany belgili. «Qazir barlyq derlik mektep dırektorlary men muǵalimder keıbir 11-synyp túlekterin UBT tapsyrmaýǵa úgitteý ústinde. Tipti nashar oqıtyn 9-synyp oqýshylaryn kolledjderge qýyp jatyr»,-delingen bul maqalada.

Atalmysh basylym búgingi sanynda taǵy «Qazaqstanda temeki ekspansııasy kúsheıip otyr»,-degen taqyryppen materıal basty.  Onda elimizde jyl saıyn 25 myń adam shylym shegýdiń saldarynan ajal qushatyndyǵy aıtylady. Bul-ólim-jitimdi alyp tastaǵanda, bir jylda bolatyn tabıǵı ósimniń teń jartysy. Sóıtip, qazaq temekiden qyrylyp jatyr. Al sheteldik kompanııalardyń tasy órge domalap, kásipteri órkendep keledi.

***

«Ekspress-K» basylymynyń «Komý ı kobyla - tekıla» taqyrybyndaǵy maqalasynda, elordanyń túngi demalys oryndarynyń birinde qymyzdan jasalǵan alkogoldik kokteıl jasalatyndyǵy aıtylǵan. Onyń quramynda qymyzdan basqa tekıla, brendı, apelsın sıropy jáne apelsınniń ózi qosylady. Dástúrli túrde sútten jasalǵan kokteılderdi kóbinese názik jandylar ishedi eken, alaıda atalǵan sýsyn erler arasynda da joǵary suranysqa ıe bolyp otyrǵan kórinedi.