Bala-shaǵasymen joldan júgirip ótpek bolǵan otbasynyń bir múshesi apatqa ushyrady
Oqıǵanyń vıdeosy áleýmettik jelide jarııalandy. Kólik ersili-qarsyly aǵylyp jatqan jáne joldan ótýge ruqsat joq jer. Alaıda, balalarynyń birin kóterip, endi birin jetektegen eresek adamdar jyldam kesip ótpek bolǵan. Joldyń ortasyna jetip, aryqaraı júgire bergende qyz bala apatqa ushyraıdy, al áıel adam bir balamen keıin sheginip úlgergen.
Almaty qalalyq polıtsııa departamentiniń málimetinshe, jol apaty búgin, 25 shilde kúni saǵat 15:00 shamasynda Jetisý aýdanynda boldy.
«Mercedes» kóliginiń júrgizýshisi Soltústik aınalma kóshesimen soltústik baǵytta kele jatyp, joldy kesip ótip bara jatqan jaıaý júrginshini qaǵyp ketti. Zardap shekken jaıaý júrginshi jedel járdem kóligimen aýrýhanaǵa jetkizildi. Atalǵan jol-kólik oqıǵasyn Jetisý aýdany polıtsııa basqarmasynyń qyzmetkerleri tergeıdi. Tıisti saraptamalar taǵaıyndaldy», - dedi Almaty qalalyq Polıtsııa departamentiniń resmı ókili Saltanat Ázirbek.