Bala kúnimde oıynshyǵym bolǵan joq - qýyrshaq teatrynyń artısi
- Sábıla Meńdiǵalıqyzy, ónerdegi áriptesterińiz sizdi «Qarashash» dep ataıdy. Ol qaıdan shyqqan?
- Bireý bilse, bireý bilmes: men egizdiń syńarymyn. Ámına atty syńarym bar. Ata-anamyz erterek dúnıeden ótti. Ájemizdiń qolynda óstik. Bizdi sondaı jaqsy kórdi. Meni Qarashash Ámınany Altynshash deıtin. Ájem meniń eki aıaqty taksıim bolatyn, arqasyna salyp júretin. Sosyn jyl saıyn meniń shashymdy ózgertip otyratyn. Kóz tımesin dep birese tulym qoıatyn, birese aıdar qoıatyn, birese kekil qoıyp, jan-jaǵyn qaıshymen qıyp tastaıtyn. Sóıtip ósken balamyn.
- Balalyq shaǵyńyzǵa saıahat jasaıyqshy. Bala kúnińizde qandaı oıynshyqtaryńyz boldy?
- Bala kezde eshqandaı oıynshyǵym bolǵan joq. Men qyz balamyn ba, ul balamyn ba túsinbedim. Nege deseńiz, kempirdiń qolynda óskennen keıin qysty kúni bizge kýfaıka tigip beretin. Sosyn endigi jyly kıedi ǵoı dep úlken kırzovyı etik alatyn. Sóıtip balalyq shaǵym ótti.
- Qýyrshaq teatryn tańdaǵan adam qandaı bolýy kerek?
- Ol adamnyń ózi ómir baqı bala bolýy kerek. Balalyq qasıet – ol júreginde, qartaısa da, sol júreginde qalady. Sonda ǵana ol qýyrshaq teatrynda isteı alady.
- Qýyrshaq teatrynyń artısi bolýdyń ereksheligin atap ótseńiz?
- Qýyrshaq teatrynyń ereksheligi – jan-jaqtylyq. Bizdiń artısterdiń basqa drama nemese mýzykalyq teatrynyń artısterinen basty ereksheligi bir qoıylymda bir adam birneshe rólderdi somdaı beredi. Mysaly, «Aýyl ıti Aqbaı» atty qoıylymda bir artıst ıttiń rólin somdasa, dál sol qoıylymda mysyqtyń rólin de oınaıdy. Sodan keıin, qýyrshaq teatrynda er adamnyń daýysy áıel adamnyń daýysy dep bólinbeıdi. Ekeýi de qýyrshaqtardyń qaı túri bolsyn bólmeı somdaı beredi. Mine, qýyrshaq teatrynyń basty ereksheligi osy.
- Osy kúnge deıin balalyqtan ajyramaǵan qandaı qasıetińiz bar?
- Bizdiń teatrdyń kórermenderi kishkentaı balalar. Olardyń kúlkisi shynaıy, qóńili taza. Jalpy, sahna ártisi kórermenen shabyt alady. Biz balalarmen birge shattanamyz, sóıtip júrgende ózimiz bala bolyp ketemiz.
- Bir suhabatyńyzda arnaıy bilimim joq depsiz...
- Ras. Arnaıy bilimim joq. Oqýym – teatr. Men Sábıra apaıym sııaqtymyn. Meniń kindik qanym tamǵan jerim Atyraý oblysy Mahambet aýdany burynǵy ıAmanka deıdi, sonda oqyp júrgenimde «Aq jaıyq» degen ansambl boldy, sol ansamblde men óner kórsettim. Bir kúni bizge Almatydan ártis qyzdar keldi de maǵan osy Almatyǵa kelýge usynys jasady. Biraq ol kezde men qýyrshaq teatrynyń bar ekeninen habarym bolmapty. Sodan ne de bolsa Almatyǵa oqýǵa túsemin dep keldim de, myna panfılovshylar parkiniń janynda júrip osy teatrdy kórdim de kirip kettim sodan beri mine teatr sahnasynda júrgenime jarty ǵasyrdan astam ýaqyt ótipti. Sondyqtan oılaımyn bul teatr meniń taǵdyrym. Qudaıǵa shúkir, qansha dırektormen jumys istedim, eshqaısysyna ókpem joq, bárinen de tálim-tárbıe alyp, osyndaı ataqqa jetip otyrmyn.
- Ózińizge, qandaı obraz jaqyn?
- Men 200- den astam ról somdadym. Jalpy teatrda qandaı ról beriledi sony somdaısyń ǵoı, al endi meniń keıipkerlerim minezdi obrazdar - mystan, ibilis, saıtan kempir. Janýarlardan túlki bar. Biraq osylardyń ishindegi mystannyń rólderin erekshe jaqsy kóremin. Teatrymyzda Nurlan Orazalınniń «Aq qus týraly ańyz» atty qoıylymy sahnalandy, sondaǵy mystan meniń súıikti beınem.
- Ómirińizdi qandaı janrǵa jatqyzar edińiz?
- Tragıkomedııa. Meni ómir erkeletti dep aıta almaımyn. Biraq ulym men qyzym áli kúnge deıin erkeletedi.
-Baqyt degen siz úshin ne?
- Baqyt degen – bala ǵoı, táp-tátti nemerelerim.
- Áńgimeńizge, rahmet!