Bala kúninde Prezıdentten bata alǵan jigit «Elbasy jáne men» baıqaýynda jeńimpaz boldy
Áleýmettik jelilerdegi daýys berý qorytyndysy boıynsha úzdik fotosýrettiń ıesi - Baýyrjan Isabaev. Baýyrjan Almaty qalasynda turatyndyqtan marapattaý rásimine qatysa almady. Marapat onyń ápkesi Gúlmıra Isabaevaǵa tabystaldy. Ol fotosýret tarıhymen de bólisti.
«Sýret 2006 jyly Nursultan Ábishulynyń qatysýymen Almaty oblysynyń Qarasaı aýdanyndaǵy Naýryzbaı batyr eskertkishiniń ashylýynda túsirilgen. Іnim Prezıdentti kórip, «Ata!» dep aıqaılady. Memleket basshysy oǵan jaqyndap, batasyn berdi. Bul - bizdiń otbasy úshin tarıhı kún. Qazir inim óte tabysty, otbasynyń maqtanyshy, oqýda úzdik ári sportpen shuǵyldanady. Biz oǵan úlken úmit artamyz», - deıdi Gúlmıra Isabaeva.
Qoǵamdyq damý mınıstrligi Jastar saıasaty departamenti tóraǵasynyń mindetin atqarýshy Ashat Oralov atalmysh baıqaýdyń osynsha tanymaldyqqa ıe bolatynyn kútpegenin aıtty.
«Eki apta ishinde áleýmettik jelilerde bes júzden astam fotosýret jarııalandy. Búgingi galereıaǵa Memleket basshysymen túsken 50 úzdik fotosýret qoıylǵan. Jeńimpazdar áleýmettik jeliler arqyly tańdaldy», - dedi A. Oralov.
Konkýrstyń qorytyndysy boıynsha, Azamat Bekbergen men Ashat Nalshybek ekinshi, Aıgúl Bóketova, Ǵazız Qulyntaı jáne Aqylbek Danabek úshinshi júldeni ózara bólisti. Qazylar alqasy tańdaǵan eń tańdaýly fotosýretter Mega Silk Way OSSO, Tuńǵysh Prezıdent kitaphanasy jáne «Han Shatyr» saýda ortalyǵyndaǵy kórmege qoıylady. Áleýmettik jelilerdegi #elbasyjanemen heshtegi 500-den astam post jarııalansa, baıqaýǵa júzden astam adam qatysty.
Baıqaýdy Qazaqstan Respýblıkasy Qoǵamdyq damý mınıstrliginiń jastar jáne otbasy isi jónindegi komıteti Astana qalasy qoǵamdyq damý isteri basqarmasymen birlesip uıymdastyrdy.