Bala kezimnen sándi kıingendi jaqsy kóremin – 84 jastaǵy tıktoker
– Tileýǵalı ata, qazaqstandyqtarǵa onyń ishinde jastarǵa tıktoker retinde tanyldyńyz. Álem qaraıtyn jelide joǵary qaralym jınap júrsiz, vıdeo túsirip, ony áleýmettik jelige júkteý oıyńyzǵa qalaı keldi?
– Tegin, kezdeısoq eshteńe bolmaıdy. Ár nárseniń óz bastaýy bolady. Eki jyl buryn Qudaı qosqan jarymnan aıyrylyp qaldym. Soǵan kóńilim qulazyp, júregim syzdap júrdi. Bala-shaǵaǵa kórsetpeýge tyrystym. Alaıda nemerelerim meniń muńaıyp júrgenimdi kórip, kóńilimdi aýlaý úshin TikTok jelisin úıreti. Onda tanymal bolamyn dep oılamadym. Bastapqyda salǵan dúnıelerimdi bir mıllıon, artynsha eki mıllıon adam qarapty. Tańǵaldym. Rolıkterdi montajdaýǵa nemerem Marııam kómektesedi. Alaıda maqsatym – tanymal bolý emes, nemere, shóberelerime qoldaý kórsetip, shabyt syılaý.
– Siz sándi kıimderdi tek túsirilim úshin ǵana kıesiz be?
– Jarasymdy kıine bilý de óner. Bul – kez kelgen adamnyń talǵamynyń kórinisi. Men bala kezimnen sándi kıingendi jaqsy kóremin. Bizdiń kezimizde jaqsy kıim tabý ońaı emes edi. Ózimnen úlken aǵalarymnan qalǵan shalbar, jeıde, kostıýmderin qysqartyp, ózime shaqtap tigip alatynmyn. Moda bizdiń kezde de boldy, shyraǵym. Teledıdardan kórgenimizdi satyp ala almasaq ta, tigip alý qolymyzdan keletin. Sándi, ózgeshe kıinip júrý ádet bolyp qalady eken. Bastysy, er adamnyń ústindegi kıimi taza ári jarasymdy bolsa boldy.
– Talǵammen kıinetin sizge erekshe stıldegi kıimdi kim tańdap beredi?
– Men kıimdi ózim tańdaımyn. Ózime unaǵanyn ǵana kıemin. Kempirim bolǵan ýaqytta da kóp keńes bergen joq. Men Sizge bir qupııamda ashaıyn. Erekshe kıimdi Second Hand dúkeninen alamyn. Ol jerde kıilmegen kıim de satady. Ondaǵy keıbir kıimderdi tanymal, qymbat magazınderden de tabý qıyn. Biraq, bul týraly kóp jerde aıtpaımyn.
– Áleýmettik jelilerdiń arqasynda kıno men jarnamaǵa túsýge shaqyrtý alyp jatyr ekensiz, ras pa?
– Iá. Kóbine epızodtyq kórinisterde oınaımyn. «Qara bala», «Kanıkýly» degen fılmderge tústim. Jaqynda «Akademııa» dep atalatyn shekarashylar týraly serıalǵa shaqyrdy. Túsirilim Almatydaǵy akademııa qabyrǵasynda ótti. Onda bir aqsaqaldyń rólin somdadym. Ózime qatty unady. Jaqsy adamdarmen tanysyp, jastarmen kóbirek sóılesesiń.
Aıtpaqshy, 1966 jyldary stýdent kezimde Abdolla Qarsaqbaevtyń «Mazasyz tań» fılminde epızodtyq rólde oınaǵanym bar. Men ІІM júıesinde jáne «Dınamo» sport qaýymdastyǵynda memlekettik qyzmette jumys istegen adammyn. Sportshylar men ishki ister organdarynyń qyzmetkerlerin daıyndadym. Al qazir zeınetkermin. Bos ýaqytym kóp.
– Seksenniń tórteýine kelgende ǵalamtordy da qapysyz meńgerip aldyńyz. Áleýmettik jelide jeke paraqshańyz da bar. Sergeksiz, shıraq qımyldaısyz. Munyń qupııasy nede?
– Barlyq nársege eńbektiń arqasynda qol jetkizesiń. Jaqsy nárse oılap, jaqsy nárseni armandaý kerek. Men salamatty ómir saltyn ustanamyn. Kóp júremin, jattyǵý jasaımyn. Taza aýada serýendeımin. Saıabaqqa jıi baramyn. Jas erekshelikterine qaramastan adamdarmen kóp aralasýǵa tyrysamyn. Bos ýaqytymdy nemere-shóberege arnaımyn. Bary osy.
– Búkpesiz áńgimeńizge raqmet. Aman bolyńyz!