Bala kezinen epılepsııasy bar boıjetkenniń mıyna ota jasalyp, ustamasy basylǵan

ASTANA. QazAqparat – Ulttyq neırohırýrgııa ortalyǵynyń dárigerleri náreste kezinen epılepsııamen aýyratyn 25 jastaǵy patsıenttiń mıyna operatsııa jasady, dep habarlaıdy QazAqparat Densaýlyq saqtaý mınıstrligi saıtyna silteme jasap.

«Anam 1 jasymda alǵashqy qysqa merzimdi epılepsııalyq ustamany bastan ótkergenimdi aıtqan. Ustama kezinde qatyp qalyp, ernim kógerip, aýzymnyń jan jaǵy aǵaryp ketipti. Alty jasymnan bastap antıkonvýlsanttardy qabyldaı bastadym. Biraq, jyldar óte kele dári-dármekterdiń áseri azaıdy, ustamalar jıilep ketti, bir kúnde 3-4 qurysý paıda boldy. Ár ustamadan keıin qalpyma kelý úshin kóp ýaqyt qajet boldy. Sodan aýrýym jáne ony emdeý ádisteri týraly aqparatty izdeýime týra keldi. Ulttyq neırohırýrgııa ortalyǵynyń saıty arqyly Gaýhar Ibatovanyń qabyldaýyna jazyldym.

Dárigerler MRT sýretterin zerttedi, zertteý ustamalar kezinde júrgizilgen ıktaldyq EEG-ten keıin epılepsııa kezinde hırýrgııalyq emdeý múmkindigin aıqyndady.

Operatsııadan keıin 7 kún ótti, ázirge ustamalar baıqalmaıdy», - deıdi patsıent.

Asa kúrdeli operatsııany professor, QR UǴA akademıgi Serik Aqsholaqov, mı patologııasy neırohırýrgııa bólimshesiniń neırohırýrg dárigerleri Muratbek Tileýbergenov jáne Dáýren Jaqsybaev júrgizdi. Sondaı-aq, operatsııa kezinde dárigerlerdiń kópbeıindi toby jumys istedi, onyń quramynda tájirıbeli dárigerler boldy. Olar: dáriger-anestezıolog Raýshan Tokshekenova jáne dáriger epıleptolog-neırofızıolog Gaýhar Ibatova.

«Neıronavıgatsııa men elektrokortıkografııany qoldana otyryp, mıdyń «qyrtysyn» tikeleı jaza otyryp, oń jaqtan gıpokampty mıkrohırýrgııalyq alyp tastaý operatsııasyn jasadyq. Dıametri 3h3 sm bolatyn oń jaq samaı bóliginiń keń epıleptogendik oshaǵy alyndy. Operatsııanyń kúrdeliligi mańdaı jáne samaı bóliginiń kóptegen aıqyn jabyspasymen baılanysty boldy. Sondaı-aq, jabyspalar mı qyrtysynan bólindi. Bizdiń mindetimiz oshaqty joıýdyń tutastyǵyna umtylý ǵana emes, sonymen qatar patsıenttiń ómir súrý sapasyn saqtaý boldy.

Mı zatynyń onyń astynda jaqyn jatqan qabyqshalarmen jabysýlarynyń bolýy operatsııa protsesiniń kúrdelenýine ákelip soǵady, bul fýnktsıonaldyq aımaqtardyń qyrtysty betterine zaqym keltirý yqtımaldyǵyn arttyrady. Osy operatsııa patsıenttiń ómir súrý sapasyn tek jaqsy jaqqa ǵana ózgertedi dep úmittenemiz», - deıdi nevrolog-epıleptolog, «UNO» AQ professory Gaýhar Ibatova.

Operatsııa patsıent úshin nevrologııalyq tapshylyqsyz sátti ótken. Patsıentte epılepsııalyq ustamalar operatsııa jasalǵan kúnnen bastap paıda bolmaıdy. Bul josparly operatsııa MÁMS sheńberinde tegin jasaldy.