Baqytjan Jumaǵulov jataqhana qurylystarynyń baıaý júrý sebebin atady

ASTANA. QazAqparat - Astanada ótip jatqan «Nur Otan» partııasy bastaýysh uıymdarynyń respýblıkalyq forýmynda senator Baqytjan Jumaǵulov elimizdegi jataqhanalardyń qurylysyna kedergi bolyp otyrǵan faktorlarly atady, dep habarlaıdy QazAqparat tilshisi.

Memleket basshysynyń Bes áleýmettik bastamanyń úshinshisi - «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý» baǵyty týraly aıta kele Baqytjan Jumaǵulov 2018-2019 oqý jylynda granttardyń sany 20 myń kóbeıtilgenin tilge tıek etti. Sonymen birge, jataqhana qurylysyn júrgizýdiń jańa qarjylyq mehanızmin qarastyratyn zańnamalyq baza ázirlengen. Qazirdiń ózinde myń jarym oryndyq tórt jataqhana paıdalanýǵa berilip qoıǵan.

«Osy jumysqa kedergi bolyp otyrǵandar týraly aıtar bolsam, birinshiden jataqhana qurylysy boıynsha jobalyq-smetalyq qujatty daıyndaý jumystarynyń baıaýlyǵyn atar edim. Ekinshiden, ákimder men JOO rektorlary ınvestorlarmen jetkiliksiz deńgeıde jumys júrgizbeı jatyr. Úshinshiden, jer ýchaskesin berý baǵytynda jergilikti atqarýshy organdardyń jumysynda da jetispeýshilik bar. Meniń paıymdaýymsha, ol jerlerde partııalyq uıymdar osy máselelerge basa nazar aýdarýy kerek», - dedi Baqytjan Jumaǵulov.

Senator sonymen birge stýdentter men magıstranttar, doktoranttar úshin 2022 jyldyń sońyna deıin 75 myń oryndyq jataqhanalardy paıdalanýǵa berý kózdelip otyrǵanyn aıtyp ótti.