Baqytjan Saǵyntaevqa jańa Nurkent qalasynyń qurylysy jaıly baıandaldy

ASTANA. QazAqparat - Almaty oblysyna jumys sapary barysynda QR Premer-Mınıstri Baqytjan Saǵyntaev jańa óndiris oryndary ashylyp jatqan «Taldyqorǵan» ındýstrıaldy aımaǵynyń jumysymen tanysty, sonymen qatar aımaqtaǵy turǵyndardy jumyspen qamtý boıynsha sharalar týraly esepti tyńdady, dep habarlaıdyprimeminister.kz.

B. Saǵyntaevqa «Taldyqorǵan», «Bereke» ındýstrıaldy aımaqtarynyń aǵymdaǵy qyzmeti, «Qorǵas - Shyǵys qaqpasy» AEA jumysy týraly málimet berildi, sondaı-aq Panfılov aýdanyndaǵy jańa Nurkent qalasynyń qurylys barysy jáne Gate Sity seriktes qalasyn damytý týraly baıandaldy.   

Qazirgi kezde ındýstrıaldy aımaq aýmaǵynda barlyǵy 11 kásiporyn jumys istep tur, onyń ishinde metall buıymdaryn, jylytatyn bazaltti plıtalardy, asfalt, beton men basqalaryn óndiretin zaýyttar men tsehter bar. Sonymen qatar aldaǵy ýaqytta taǵy 9 kásiporyn osy jerge óz óndiristerin ornalastyrýdy josparlaýda.  

Jańa óndiristerdi bilikti mamandarmen qamtamasyz etý úshin óńirde turaqty túrde bos jumys oryndary jármeńkeleri ótkizilip turady. QR Premer-Mınıstri B. Saǵyntaev «Jastar» atty jańa saıabaqtaǵy bos jumys oryndary jármeńkesine bardy, munda 100-ge jýyq kásiporyn 1500-den astam jumys ornyn usyndy.

Baqytjan Saǵyntaevqa mundaı jármeńkelerdiń jıi ótkizilýi esebinen, bıylǵy jyldyń basynan beri 6 myńnan astam adamdy jumysqa ornalastyrý múmkin bolǵany baıandaldy. Onyń ishinde turaqty jumys oryndarymen 2300-ge jýyq adam, maýsymdyq jumyspen - 1300 adam qamtamasyz etildi, jergilikti bıýdjet qarajaty esebinen aqy tólenetin qoǵamdyq jumystarmen 2700 adam qamtyldy.