Baqytjan Saǵyntaev serbııalyq kásipkerlerdi Qazaqstanǵa shaqyrdy
«Aıtarlyqtaı ekonomıkalyq áleýetke ıe Serbııa Qazaqstannyń Eýropadaǵy senimdi seriktesi sanalady. Biz Serbııanyń basty halyqaralyq bastamalarymyzda jan-jaqty qoldaýyn joǵary baǵalaımyz. Saýda-ekonomıkalyq saladaǵy yntymaqtastyq nyǵaıyp keledi. Ótken jyly Qazaqstan men Serbııa arasyndaǵy taýar aınalymy 59 paıyzǵa ósti. Degenmen, aqshaǵa shaqsaq, bul aıtarlyqtaı kóp emes. Sondyqtan Prezıdent myrzamen ekijaqty kelissózder barysynda bıznestik qarym-qatynastarymyzdy barynsha joǵary deńgeıge kóterýge bolatyn túrli baǵyttardy talqyladyq», - dedi QR Premer-Mınıstri.
Osy rette, Úkimet basshysy serbııalyq kásipkerlerge Qazaqstanda júrgizilip jatqan bıznesti qoldaý sharalaryn aıtyp berdi. Onyń atap ótýinshe, sońǵy 4 jylda elimizde salyq jáne kedendik salada 52 reforma jasalyp, salyqtyń júktemeler ońtaılandyrylǵan.
«Búgin Serbııa Prezıdentimen Qazaqstandaǵy birinshi iri bıznes jobanyń, bolashaq turǵyn úı kesheniniń irgetasyn qalaý sharasyna qatysý qurmetine ıe boldym. Atalǵan joba aıasynda áleýmettik ınfraqurylym salý qajet. Ol: aýrýhana, emhana, mektep, balabaqsha. Prezıdent myrza sizdiń bıznesmenderińiz qazirden-aq bul máseleni qarastyrýlaryna bolady», - dedi Baqytjan Saǵyntaev.
Premer-Mınıstr serbııalyq kásipkerler atalǵan turǵyn úı kesheni aýmaǵynda memlekettik-jekeshilik áriptestik aıasynda belgili bir áleýmettik nysan qurylysyn júrgize alatyndyǵyn aıtty.
Aıta keteıik, bıznes forýmǵa elimizge resmı saparmen kelgen Serbııa Prezıdenti Aleksandr Výchıch ta qatysyp, qazaq bıznesmenderin óz eline ınvestıtsııa quıýǵa shaqyrǵan edi.
Shara barysynda eki eldiń arasynda 4 memorandýmǵa qol qoıyldy.