Baqytjan Saǵyntaev Oraldaǵy jańa turǵyn úılerdiń sapasyn tekserdi

ASTANA. QazAqparat - QR Premer-Mınıstri Baqytjan Saǵyntaev Batys Qazaqstan oblysyna jumys sapary barysynda «Nurly Jer» baǵdarlamasy aıasynda turǵyzylǵan turǵyn úılerdi aralady

Nysandardy aralaý barysynda B. Saǵyntaev turǵyn úılerdiń sapasyn tekserip, «Nurly Jer» baǵdarlamasyn iske asyrý boıynsha ári qaraıǵy josparlar týraly esepti tyńdady. Budan ózge, Premer-Mınıstrge Oral qalasynyń eski apatty úılerin qulatý boıynsha memlekettik-jekeshelik áriptestik jobalary tanystyryldy, dep habarlady primeminister.kz .

Óńirdegi alǵashqy kóppáterli úıler úıqurylysy kombınaty tehnologııasy boıynsha turǵyzylady. Onyń artyqshylyǵy - úıler salystyrmaly túrde jyldamyraq turǵyzylady. Mysaly, 72 páterli úı 1,5-2 aıdyń ishinde turǵyzylady. Sonymen qosa, qurylys jumystaryna otandyq materıaldardyń joǵarǵy paıyzy, zamanaýı jabdyqtar qoldanylady.

Aıta ketý kerek, Memleket basshysy «Qazaqstannyń úshinshi jańǵyrýy: jahandyq básekege qabilettilik» atty QR halqyna Joldaýynda otandyq ekonomıkanyń tolyqqandy draıverine aınalýǵa tıisti qurylys sektoryn damytý týraly mindet qoıdy. Osy oraıda Úkimet qurylys pen qurylys materıaldary óndirisin jańa tehnologııalar transfertimen qamtamasyz etý boıynsha belsendi jumystar júrgizýde.

«Nurly Jer» turǵyn úı baǵdarlamasyn iske asyrý aldaǵy 15 jylda 1,5 mıllıon otbasyn turǵyn úımen qamtamasyz etýge baǵyttalǵan.