Baqytjan Saǵyntaev Oraldaǵy áýejaıdyń damý josparymen tanysty
13:03, 29 Naýryz 2017
ASTANA. QazAqparat - QR Premer-Mınıstri Baqytjan Saǵyntaev Batys Qazaqstan oblysyna jumys sapary aıasynda Oral qalasy áýejaıynyń jolaýshylar termınaly men qaýipsizdik júıesiniń jumysymen, sonymen qatar áýejaıdy qaıta jóndeý jumystarynyń josparymen tanysty.
Bul týraly primeminister.kz habarlady.
Oral qalasynyń halyqaralyq áýejaıy 1972 jyly paıdalanýǵa berilgen. Aerovokzaldyń ótkizý qabileti saǵatyna 200 jolaýshyny, termınaldyń ótkizý qabileti - saǵatyna 100 jolaýshyny quraıdy. Áýejaı kesheni qajetti arnaıy tehnıkamen jáne áýe kemelerine, jolaýshylarǵa qyzmet kórsetý men ushyp-qoný jolaǵyn ári perrondy qoldanystyq kúıde saqtaý úshin qyzmet kórsetetin qyzmetkerlermen qamtamasyz etilgen.
Buǵan deıin 2014-2015 jyldary áýejaıdyń jasandy ushyp-qoný jolaǵynda qaıta jóndeý jumystary júrgizilgen. Ol barlyq túrdegi zamanaýı áýe kólikterin qabyldaýǵa qajetti sanatty alýǵa múmkindik berdi.