Baqytjan Saǵyntaev Nur Otan-ǵa júgingen turǵyndardyń saýalyna jaýap berdi

ALMATY. QazAqparat - Nur Otan partııasy Almaty qalalyq fılıalynyń tóraǵasy, Almaty ákimi Baqytjan Saǵyntaev partııanyń qoǵamdyq qabyldaýyna júgingen qalalyqtardyń suraqtaryna jaýap berdi, dep habarlaıdy Qazaqparat tilshisi.

«Jetisý-3» shaǵyn aýdany turǵyndarynyń ótinishi boıynsha qurylysy uzaqqa sozylǵan nysan ornalasqan ýchaskeni salýshy aldaǵy atqarylatyn jumystar boıynsha turǵyndarmen kezdesip, barlyq qujat pen jobalardy kórsetetin bolady.

Munda irgeles aýmaqtar men aýlany abattandyrý eskerilýi tıis. Turǵyndar pikiri eskerilmese qurylysty salýǵa ruqsat berilmeıdi.

Almaly aýdany turǵyndarynyń saýda nysanynyń ornyna balalar sport alańyn salý týraly ótinishi de qoldaý tapty.

Hodjanov kóshesi boıyndaǵy №76 úıdiń turǵyny N. Kotovanyń saýaly boıynsha aýlany jańartý kelesi jylǵa josparlanǵan.

Alaıda Nur Otan Almaty qalalyq fılıaly tóraǵasynyń tapsyrmasy boıynsha bıyl fýtbol alańy jasalyp, jaz kezinde balalardyń densaýlyǵyn jaqsartýǵa múmkindik týady.

Saǵyntaevtyń tapsyrmasy boıynsha «Terekti» shaǵyn aýdan turǵyndarynyń kólik jolaıryǵyn salý jónindegi suraqtary pysyqtalady, qurylys júrip jatqan jerge baryp, másele zerdelenedi.

Budan ózge, ótinish bildirgen qala turǵyndaryna «Kýrortnoe» saıajaı aýmaǵynda jáne «Qaraǵaıly» shaǵyn aýdanynda ınjenerlik jelilerdi salý merzimi habardar etildi.