Baqytjan Saǵyntaev: Medıtsınalyq qyzmetterdiń sapasy artady

ALMATY. QazAqparat– Almatyda medıtsınalyq qyzmetterdiń sapasy artady. Bul týraly Almaty qalasynyń ákimi Baqytjan Saǵyntaev «Dýman» yqshamaýdanynyń turǵyndarymen ótken kezdesýde aıtty, dep habarlaıdy QazAqparat tilshisi.

Shahar basshysy Baqytjan Saǵyntaev Medeý aýdany ákiminiń eseptik kezdesýine qatysty. Jıynda Sultanbek Almasbekuly aýdannyń áleýmettik-ekonomıkalyq damýy men sheshilgen ınfraqurylymdyq máseleler týraly baıandady.

Ótken jyly jalpy uzyndyǵy 33 shaqyrym bolatyn 19 kósheniń syrtqy jaryqtandyrý jelisiniń qurylysy aıaqtaldy. 1084 jaryq núkteleri ornatyldy. Aǵymdaǵy jyly 279 kóshede jáne 27 aýlada 6200 jaryq núktesin ornatý josparda.

Qala ákiminiń tapsyrmasy boıynsha, ótken jyly Kereı men Jánibek han kósheleriniń máselesi sheshildi. Munda kóshkin saldarynan jeke úılerdiń qulaý qaýpi bolǵan. Qazirgi ýaqytta betkeıdi nyǵaıtý jumystary aıaqtaldy. Jol jóndelip, abattandyrý jumystary júrgizildi.

Sondaı-aq birneshe jyldan beri kóktemgi jáne kúzgi ýaqytta «Terisbulaq» ózeniniń boıyndaǵy 50-den astam jeke turǵyn úıdi sý basatyn. Bul máselede óz sheshimin tapty. Ózen arnasyn tereńdete otyryp, qalpyna keltirý-nyǵaıtý jumystary júrgizildi.

Sonymen qatar, 2019 jyly Medeý aýdanyna qarasty 52 aýlaǵa kúrdeli jáne 30 aýlaǵa aǵymdaǵy jóndeý jumystary júrgizildi. Bıyl taǵy 41 aýla qaıta qalpyna keltiriledi. Qala ákiminiń tapsyrmasy boıynsha «Taý-Samal», «Keńsaı», «Kólsaı», «Sulýsaı» yqshamaýdandarynda 4 feldsherlik-akýsherlik pýnkt ashyldy. Osylaısha 12 myńnan astam turǵynǵa medıtsınalyq kómektiń qoljetimdiligi qamtamasyz etildi.

Eseptik jıynǵa qatysqan qala ákimi Baqytjan Saǵyntaevtyń aıtýynsha, medıtsınalyq mekemelerdi jabdyqtarmen qamtamasyz etý máselesi ózektiligin joıǵan emes. Ótken jyly júrgizilgen aýdıt qalanyń emhanalary men aýrýhanalarynyń jabdyqtalýy nebári 20%-dy quraıtynyn kórsetti.

«Sondyqtan biz qalanyń medıtsınalyq mekemelerin jańartý men qajetti jabdyqtarmen jaraqtandyrýdyń úsh jyldyq josparyn ázirledik. Osylaısha medmekemelerdiń jabdyqtalýyn 90%-ǵa jetkizbekpiz. Osy jylǵa qarajat bólindi», – dedi qala ákimi.

Kezdesýdi qorytyndylaı kele, Baqytjan Saǵyntaev turǵyndardy ashyq áńgimesi úshin alǵys bildirip, mundaı kezdesýler ákimdiktegilerge turǵyndardyń talap-tilegin jaqynyraq bilýge múmkindik beretinin aıtty.

«Shaǵyn ýchaskelerdegi mundaı kezdesýler ár aýdanda ótýde. Turǵyndardyń belsendiligi jergilikti sıpattaǵy problemalardy jedel sheshýge, sondaı-aq qysqa merzimdi jáne orta merzimdi damý josparlaryna túzetý engizýge septigin tıgizedi», – dep atap ótti Baqytjan Saǵyntaev.