Baqytjan Saǵyntaev QR Bas prokýratýrasyn tsıfrlandyrý jobalarymen tanysty

ASTANA. QazAqparat - Búgin Astanada QR Premer-Mınıstri Baqytjan Saǵyntaev Bas prokýratýrany tsıfrlandyrý barysymen, naqtyraq aıtqanda jobalardy iske asyrýdyń negizgi baǵyttary, alǵashqy nátıjelerimen tanysty, dep habarlaıdy primeminister.kz. 

Sharaǵa tájirıbe júzinde jańa tsıfrlyq tehnologııalardy engizip jatqan memlekettik organdar men bıznes ókilderi qatysty.

Bas prokýror Qaırat Qojamjarov qadaǵalaýshy organ qylmystyq jáne ákimshilik sot isin júrgizýdiń birtindep elektrondyq formatqa kóship, memlekettik organdardyń tekseristerin tirkeý jáne azamattardyń ótinishterin qaraý protsesteri avtomattandyrylyp jatqanyn aıtty.
Jobalardyń negizgi maqsaty - azamattardyń quqyqtaryn qorǵaý kezinde, sot tóreligine jáne protsesterdiń aıqyndyǵyna jyldam qol jetkizýdi qamtamasyz etýde barynsha tıimdilikke qol jetkizý.

Tsıfrlandyrýdyń negizgi baǵyttary arasynda «Elektrondyq qylmystyq is», «Elektrondyq ótinim», «Ákimshilik is júrgizýdiń biryńǵaı tizilimi», «Tirkeý obektileri sýbektileriniń biryńǵaı tizilimi» jáne «Taldaý ortalyǵy» jobalary bar.

«Taldaý ortalyǵy» jobasy quqyq qorǵaý organdarynyń krımınogendik ahýal men áleýmettik shıelenisýshilik máselelerin anyqtaýǵa arnalǵan kómekshisi. Sondaı-aq, qylmystardy anyqtaýǵa yqpal etetin, jasandy zerdeni qoldaný arqyly tergeýshiniń kómekshisi qyzmeti júzege asyrylady. Bıyl jeńil qylmystar boıynsha «E-qylmystyq is» jobasynyń birinshi kezeńi iske asyrylýda.

Jalpy alǵanda, jobany elektrondyq formatta iske asyra bastaǵan ýaqyttan beri 12 myńnan astam qylmystyq quqyq buzýshylyq tergeý júrgizildi, onyń ishinde 4 myńǵa jýyǵy sotqa jiberildi.

Sondaı-aq, memlekettik organdarda ákimshilik is júrgizý avtomattandyrylyp jatyr. 1,5 myńǵa jýyq polıtsııa qyzmetkeri planshettermen jáne prınterlermen qamtyldy. 330 myń elektrondyq hattama jasaldy.

Bıznesti tekserýdi avtomattandyrý jobasynda da oń áser baıqalýda. Joba modýlderiniń biri (2018 jyldyń 1 shildesi) iske qosylǵan sátten bastap elektrondy formatta shamamen 50 myń tekseris tirkelgen, onyń 27 myńy - kásipkerlerge qatysty. Barlyq úderis avtomattandyrylǵan jáne eshbir memlekettik organ júıeden tys tekserý júrgize almaıdy.

Budan ózge, Bas prokýratýra azamattar men zańdy tulǵalardyń ótinishterin berý jáne keńeıtý protsesterin avtomattandyrýǵa baǵyttalǵan «Elektrondyq ótinimder» jobasyn engizip jatyr.