Baqytjan Saǵyntaev Qoǵamdyq keńespen epıdemıologııalyq ahýaldy talqylady
Beınekonferentsııa rejıminde ótken kezdesýde koronavırýs ınfektsııasyna qarsy is-qımyl jáne epıdemıologııalyq jaǵdaıdy turaqtandyrý sharalary boıynsha máseleler pysyqtaldy. Sonymen qatar, karantın kezinde sanıtarlyq qaýipsizdikti qamtamasyz etý jáne qala tirshiligi men ekonomıkasyn kezeń-kezeńimen qalpyna keltirý jospary Exit Strategy-di iske asyrý máseleleri talqylady.
«Almatyda epıdemııaǵa qarsy is-qımyl jumystary 6 qańtarda úsh kezeń boıynsha bastaldy. Infektsııanyń syrttan kelýin boldyrmaý maqsatynda qalaǵa kiretin barlyq halyqaralyq joldarda sanıtarlyq-epıdemıologııalyq baqylaýdy kúsheıtý; epıdemııaǵa qarsy aýqymdy is-sharalar; ınfektsııanyń jasyryn rezervýarlaryn anyqtaý jáne jappaı testileý júrgizý arqyly epıdemıologııalyq jaǵdaıdy tolyq baqylaýdy qamtamasyz etý sııaqty sharalar qabyldandy»,– dep habarlady qala ákimdiginiń baspasóz qyzmetinen.
Tegin testileýge jatatyn qaýip tobyna: medıtsınalyq uıymdardyń, quqyq qorǵaý organdarynyń, kommýnaldyq mekeme qyzmetkerleri, Ulttyq ulannyń áskerı qyzmetshileri, tynys alý joldarynda sozylmaly aýrýlary bar adamdar jáne respıratorlyq belgileri bar naýqastar jatady.
Búginde 122 myńnan astam test júrgizildi. Sonyń ishinde 102 myń adam PTR ádisimen tekserildi. Test 1872 adamda oń nátıje kórsetti. Sonyń ishinde 92% profılaktıkalyq skrınıngter kezinde; 1% – syrttan ákelingen jaǵdaılar; 7% – jergilikti jaǵdaılar.
«100 myń turǵynǵa shaqqanda PTR ádisimen tekserý kórsetkishi 4903 zertteýdi quraıdy. Bul, damyǵan eýropalyq elderdiń deńgeıine sáıkes keledi. Zerthanalyq qyzmetterdiń barlyq áleýeti iske qosyldy. Zerthanalar sany 2-den 7-ge deıin ósti, mobıldi qorshaý pýnkti ashyldy, 8 jyljymaly qabyldaý pýnktin ashý josparlanýda. Jalpy KVI-ge testileý kólemin kúnine 4500-5000 deıin jetkizý josparlanyp otyr»,– dep qosty baspasóz qyzmetinen.
Sondaı-aq, shahar basshysy Baqytjan Saǵyntaev medıtsına qyzmetkerleri men qala turǵyndaryn áleýmettik jaǵynan qoldaý sharalary týraly aıtty. Memleket basshysynyń tapsyrmasyna sáıkes, medıtsına qyzmetkerlerin qoldaýdyń keshendi júıesi quryldy. Medıtsınalyq mekemeler jeke qorǵaný quraldarynyń jetkilikti kólemimen jáne dezınfektsııa quraldarymen qamtamasyz etilgen.
Densaýlyq uıymdarynda juqtyrýdyń aldyn alý sharalary qabyldandy. Ol úshin taza jáne las aımaqtardy shekteý úshin arnaıy shlıýzder salyndy. Medıtsına mamandaryna ýaqytsha baspana berilip, ystyq tamaq pen kólik uıymdastyryldy.
Naýryz aıynda 3769 medıtsına qyzmetkerine 1134,8 mln teńge, sáýir aıynda 4391 mamanǵa 1567,5 mln teńge ústemeaqy tólendi. «Nur Otan» partııasynyń qorynan 970 medıtsına qyzmetkeri 48,5 mln teńge aldy.
Jıyn barysynda ekonomıkany jáne kásiporyndardyń qyzmetin qalpyna keltirý, jumys oryndaryn qurý, ShOB-ty qoldaý, áleýmettik máselelerdi sheshý men bilim berý nysandaryn salý, sondaı-aq qala ekologııasyn saýyqtyrý máseleleri kóterildi.
Onlaın-rejımde ótken kezdesý 2,5 saǵatqa sozyldy. Qoǵamdyq keńes músheleri óz eskertýleri men usynystaryn aıtyp, jalpyqalalyq máselelerdi sheshýde belsendi atsalysýǵa daıyn ekendikterin jetkizdi.