Baqytjan Saǵyntaev: Qazaq tilin tegin úıretetin kýrstardy jandandyrý qajet
«Tilderdi qoldaný men damytý baǵdarlamasynyń ótken jylǵy nátıjesi jaman emes. Memlekettik baǵdarlamany iske asyrýdyń eseptik kezeńdegi monıtorıngi oń úrdistiń bar ekenin kórsetip otyr. Belgili nátıjelerge qaramastan nazar aýdaratyn keıbir máseleler bar. Birinshiden, halyqqa qazaq tilin aqysyz, tegin úıretetin kýrstardyń jumysyn belsendi jandandyrý qajet. Sonymen qatar ózge tilderdi oqytyp, úıretetin kýrstardyń qoljetimdiligin arttyrý, onyń ishinde ınternet, aqparattyq resýrstar arqyly úıretýge aıryqsha kóńil bólinýi tıis. Bul Mádenıet jáne sport mınıstrligi men jergilikti atqarýshy organdardyń jumysy», - dedi Úkimet basshysy.
Premer-Mınıstrdiń aıtýynsha, tilderdi úırený men qoldanýǵa jáne arnaıy ádebıetterdi jaryqqa shyǵarýǵa memlekettik bıýdjetten qomaqty qarajat bólinip otyr. Osyǵan baılanysty halyqtyń arasynda keńinen suranysqa ıe zamanaýı oqý ádistemelik quraldardy, balalar kitaptaryn basyp shyǵarý kerek.
«Ekinshiden, qazaq tiliniń latyn grafıkasyna kóshýin iske asyrý maqsatynda túsindirý jumystaryn belsendi júrgizý qajet. Álipbıdiń kezeń-kezeńimen kóshýi boıynsha tıisti is-sharalar jospary bekitildi. Osyǵan baılanysty barlyq memlekettik organdar men uıymdarǵa is-sharalar josparynyń der kezinde oryndalýyn qamtamasyz etýdi tapsyramyn. Erbolat Asqarbekuly (QR Premer-Mınıstriniń orynbasary Dosaev) komıssııa tóraǵasynyń orynbasary retinde Arystanbek Muhamedıulymen birlese otyryp, osy jumystardy baqylaýǵa alýdy tapsyramyn», - dedi Baqytjan Saǵyntaev.
Aıta keteıik, búgingi Úkimet otyrysynda QR Mádenıet jáne sport mınıstri Arystanbek Muhamedıuly «Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasynyń» ótken jylǵy qorytyndysyn shyǵarǵan bolatyn.