Baqytjan Saǵyntaev ǵalymdardyń granttardy bólýge qatysty synyna jaýap berdi

ASTANA. QazAqparat - QR Premer-Mınıstri Baqytjan Saǵyntaev memlekettik saraptamanyń tómen baǵalaýyna ıe bolǵan jobalarǵa granttardy bóldi dep Ulttyq ǵylymı keńesti aıyptaǵan ǵalymdardyń synyna jaýap berdi, dep habarlaıdy QazAqparat.

«Bıylǵy jyldyń ereksheligine toqtalsaq, Ulttyq ǵylymı keńesterdiń (UǴK) otyrystary dybystyq ári vıdeo jazbamen qamtamasyz etildi. Sáıkesinshe, olardyń barlyǵy Ulttyq memlekettik ǵylymı-tehnıkalyq saraptama ortalyǵynyń saıtynda ornalastyryldy. Ekinshiden, «qupııa» daýys berý rásimi engizilip, bul óz kezeginde keńes múshesiniń sońǵy daýysyna yqpal etýge jol bermeıdi. Osy arqyly, Ulttyq ǵylymı keńesterdiń barynsha ashyqtyǵy qamtamasyz etildi», - delingen Úkimet basshysynyń Májilistegi «Aq jol» fraktsııasynyń depýtattyq saýalyna berilgen jaýabynda.

Onyń sózine qaraǵanda, UǴK týraly erejege sáıkes, keńes músheleri ǵylymı jobalardy granttyq qarjylandyrý konkýrsyna jobanyń ǵylymı jetekshisi retinde ǵana qatysa alady. Alaıda olar ózderi qatysatyn nemese úlestes tulǵalardyń atsalysýymen bolatyn jobalar boıynsha sheshim shyǵarmaıdy.

Sonymen birge, keńester quramy UǴK týraly ereje talaptaryna saı quryldy. Árbir keńeske álemdegi úzdik ǵylymı uıymdardyń ókilderi atanǵan shetel ǵalymdary da endi.

«UǴK-ler quramyndaǵy múshelerdiń 50 paıyzdan astamy bıznes-qoǵamdastyqtardan, «Atameken» UKP-den, ulttyq holdıngter men kompanııalardan quralǵan. Atap aıtqanda, olar akademııalyq ortanyń ókilderine jatpaıdy. UǴK quramyna bıznes-qoǵamdastyq ókilderin qosý sharalary ǵylym men naqty ekonomıkanyń qajettilikteri maqsattaryn jaqyndastyrýǵa baǵyttalǵan. Atap ótilgendeı, 2018-2020 jyldarǵa granttyq qarjylandyrýdy bólý kezinde UǴK-men ǵylym salasyndaǵy zańnama aıasyndaǵy qyzmetter iske asyryldy», - dedi Premer-Mınıstr.

Sonymen qatar B. Saǵyntaev ǵylym salasyndaǵy ókiletti organ ǵylymı saraptamany júrgizýdi retteıtin normatıvtik-quqyqtyq aktilerdi jetildirý boıynsha jumystardy atqaryp jatqanyn jetkizdi. Bul turǵyda qabyldanatyn sheshimderdiń ashyqtyǵyn ary qaraı qamtamasyz etý qadamdary eskerilgen. Osy oraıda tıisti sharalar ǵylymı qoǵamdastyqta keńinen talqylanatyn bolady.

Esterińizge sala keteıik, buǵan deıin birqatar ǵalymdar saladaǵy daý-damaı týraly máseleni kótergen bolatyn. Bul rette ǵalymdar Ulttyq ǵylymı keńester granttardy bólý erejesin óreskel buzyp jatqandyǵyn aıtqan edi.

Aıta keteıik, 2018 jylǵy aqpan aıynyń basynda QR BǴM Ǵylym komıtetiniń tóraǵasy Bolatbek Ábdirásilov bıylǵy ǵylymı jobalardy irikteý qalaı ótkenin aıtyp bergen edi.