Baqytjan Saǵyntaev tsıfrlandyrylǵan «Embimunaıgaz» AQ-nyń óndirisimen tanysty

ASTANA. QazAqparat - Atyraý oblysyna jumys sapary barysynda QR Premer-Mınıstri Baqytjan Saǵyntaev «Embimunaıgaz» AQ-da boldy, onda óndiristik protsesterdi vızýalızatsııalaý ortalyǵynyń jumysymen jáne «Tsıfrlyq ken orny» jobasynyń josparlarymen tanysty, dep habarlaıdy QazAqparat primeminister.kz saıtyna silteme jasap.

«Zııatkerlik ken orny» jobasy nemese «Tsıfrlyq ken orny» - munaı-gaz salasynyń mańyzdy baǵyttarynyń biri jáne «Tsıfrlyq Qazaqstan» memlekettik baǵdarlamasynyń is-sharalar tizimine qosylǵan. Bul munaı-gaz salasyn basqarýdyń avtomattandyrylǵan júıesi, ol jekelegen júıelerdi biryńǵaı ıntegratsııalanǵan aqparattyq júıege biriktirý arqyly maksımaldy tıimdilikke qol jetkizýge múmkindik beredi.

«Embimunaıgaz» AQ basqarma tóraǵasy Á. Jaqsybekov «Ýaz» ken orny bazasynda 2016 jyly «Tsıfrlyq ken orny» pılottyq jobasy iske qosylyp, óz tıimdiligin dáleldegenin atap ótti. Jobany engizý elektr qýatyn tutynýdy 33% qysqartýǵa, uńǵymalardy jóndeýdiń úlesti shyǵyndaryn 25% azaıtýǵa múmkindik berdi.

«Embimunaıgaz» AQ ázirlegen ádistemelerge sáıkes kelesi kórsetkishterdiń óńdeý jáne taldaý algorıtmderi avtomattandyryldy: suıyqtyq jáne munaı teńgerimi; munaıdyń joǵalýy; uńǵymalardyń jumys rejımderin ońtaılandyrý jáne t.b.

2017 jyly joba «Jylyoımunaıgaz» MGÓB Prorva ken oryndaryn ıgerý tobynyń ken oryndaryna taratyldy.

Baqytjan Saǵyntaevqa «Tsıfrlyq ken orny» jobasynyń josparlary týraly baıandaldy. 2018 jyly tujyrymdama «Jaıyqmunaıgaz» MGÓB «Jańatalap» ken ornynda júzege asyrylatyn bolady. 2019-2020 jyldary «QazMunaıGaz» ulttyq kompanııasynyń basqa ken oryndaryna engizý josparlanyp otyr. Jalpy alǵanda, jobany iske asyrý munaı óndirý kóleminiń 3% deıin ósýine, munaı óndirý (ekonomıkalyq) koeffıtsıentin 2-5% arttyrýǵa jáne shyǵyndardy 5-15% azaıtýǵa múmkindik beredi.

Anyqtama: «Embimunaıgaz» AQ - «QazMunaıGaz» Barlaý Óndirý» AQ-nyń enshiles kásiporny. Kompanııa qyzmetiniń negizgi baǵyttary: geologııalyq barlaý, munaı jáne gaz ken oryndaryn ıgerý; munaı jáne gaz óndirý; munaı men gazdy daıyndaý.

«Embimunaıgaz» quramyna Atyraýdaǵy 6 óndiristik qurylymdyq bólimshe jáne Atyraý oblysynyń aýdandarynda 4 kiredi: «Jaıyqmunaıgaz», «Dossormunaıgaz», «Qaınarmunaıgaz», «Jylyoımunaıgaz», «Embimunaıenergo» basqarmasy jáne «Óndiristik-tehnıkalyq qyzmet kórsetý jáne jabdyqtardy jıyntyqtaý basqarmasy». Búgingi tańda kompanııada 5 myńnan astam adam jumys isteıdi.

«Embimunaıgaz»-dyń ortasha jyldyq ónimi 2,8 mln tonnadan asady. Kompanııa óndirilgen munaıdy eksportqa jáne ishki naryqqa jetkizedi. Sońǵy bes jylda «Embimunaıgaz» respýblıkalyq jáne jergilikti bıýdjetterge salyq tóleý úshin shamamen 696 mlrd teńge, demeýshilik jáne qaıyrymdylyq úshin - 2,3 mlrd teńge, óńirlik ınfraqurylymdy damytýǵa 2,3 mlrd teńge bóldi.