Baqytjan Saǵyntaev aýyldyq aýmaqtardy damytý jóninde keńes ótkizdi

ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev Prezıdenttiń «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýyn iske asyrý aıasynda aýyldyq aýmaqtardyń áleýmettik ortasyn jańǵyrtý máseleleri jóninde keńes ótkizdi. Bul týraly QazAqparat primeminister.kz saıtyna silteme jasap habarlaıdy.

Keńes barysynda aýyldyq eldi mekenderdegi halyqtyń turmys sapasyn arttyrýdy kózdeıtin «Aýyl - el besigi» jobasy talqylandy. Atap aıtqanda, ekonomıka men óndiristik sektordy, ınjenerlik ınfraqurylym men kommýnıkatsııalardy, energetıka men ekologııany, qaýipsizdikti, ónimdi jumyspen qamtý baǵytyn damytý, sonyń ishinde aýyldyq jerlerde shaǵyn jáne orta bıznestiń ósýine jaǵdaı jasaý, jastardy aýyldyq aýmaqtar men agrobıznesti damytýǵa tartý máseleleri kóterildi.

Kórsetilgen sharalardy Óńirlerdi damytýdyń 2020 jylǵa deıingi qoldanystaǵy memlekettik baǵdarlamasy negizinde iske asyrý kózdelgen. Máselelerdi talqylaý barysynda Ulttyq ekonomıka, Indýstrııa jáne ınfraqurylymdyq damý, Aýyl sharýashylyǵy mınıstrlikteriniń jáne oblys ákimderiniń zamanaýı turmys sapasy standarttaryna sáıkes áleýmettik-ekonomıkalyq ınfraqurylymdy jańǵyrtý jónindegi tásilderi qaraldy.

Sonymen qatar, keńes barysynda Mádenıet jáne sport mınıstrliginiń týrızmdi basqarý júıesin odan ári damytý aıasyndaǵy usynystary tyńdaldy.

QR Premer-Mınıstri Baqytjan Saǵyntaev keńes qorytyndysy boıynsha tıisti memlekettik organdarǵa talqylanǵan máselelerge qatysty jumysty jalǵastyryp, barlyq aıtylǵan usynystardy egjeı-tegjeıli pysyqtaýdy tapsyrdy.