Baqytjan Saǵyntaev: Almatynyń árbir ekinshi qonaǵy – sheteldik týrıst

ALMATY. QazAqparat - Megapolıs ákimi Baqytjan Saǵyntaev «Almaty» telearnasyndaǵy tikeleı efır kezinde qala qonaqtarynyń qaýipsizdigin qamtamasyz etý jáne taýly baǵyttardy abattandyrý sharalary týraly aıtty, dep habarlaıdy QazAqparat tilshisi.

Ákimniń aıtýynsha, qalanyń árbir ekinshi qonaǵy – sheteldik týrıst. Byltyr pandemııaǵa qaramastan Almatyǵa 163 myń sheteldik qonaq kelgen. Qala turǵyndary men qonaqtary arasynda eń tanymal demalys túri – taýda serýendeý. Pandemııa kezinde taýly aımaqtarǵa barý tórt ese ósti.

«Qala turǵyndary men qonaqtarynyń ýaqyttaryn qaýipsiz ári jaıly ýaqyt ótkizýi úshin qajetti jaǵdaılar jasalýda. Máselen, adamdar kóp jınalatyn demalys oryndarynyń ınfraqurylymy retke keltirilýde: taýlar men ulttyq saıabaqtarda. 1 myń shaqyrym taýdyń jaıaý soqpaqtary tsıfrlandyrylyp, 500 shaqyrymy abattandyryldy»,-deıdi Baqytjan Saǵyntaev.

Onyń aıtýynsha, Shymbulaqta, Medeýde vızıt-ortalyqtar ashylǵan. Sondaı-aq Aıýsaı shatqalynda jáne «Gorelnık» termaldy kóziniń janynda da osyndaı ortalyqtar jumys isteı bastaǵan. Medeýde, respýblıka alańynda, halyqaralyq áýejaıda jáne respýblıka saraıynyń janynda týrıstik polıtsııanyń 4 pýnkti ashyldy.

«Týrısterdiń qaýipsizdigi úshin uıaly baılanystyń aımaqtary keńeıtiledi. Budan ózge, Kishi jáne Úlken Almaty shatqaldarynda 2 baqylaý-qutqarý pýnkti, Tuıyq sý qyratynda tikushaq alańy, taýly baǵyttardyń shetki toraptyq ýchaskelerinde týrıster panalaıtyn 15 lashyq salynady. Sondaı-aq, qutqarý toptaryna sıgnal berý úshin dabyldy bastyrmalary bar 10 radıoreleıli baǵana ornatylady»,- dedi ol.