Baqytjan Saǵyntaev: Ál-Farabıdiń rýhanı murasy – sarqylmaıtyn qaınar bulaq
Almaty qalasynyń ákimi Baqytjan Saǵyntaevtyń aıtýynsha, tórtkúl dúnıege tanymal ǵulama Ábý Nasyr ál-Farabı babamyzdyń 1150 jyldyq mereıtoıynyń orny erekshe. Uly oıshyldyń arnaıy zańmen bekitilgen merekelik sharalarynyń Almaty qalasynda bastalýynyń da ózindik syry bar.
Elimizdegi eń basty oqý ordasy – ál-Farabı atyndaǵy Qazaq ulttyq ýnıversıteti men Farabı muralaryn júıeli zertteıtin irgeli ǵylymı ortalyq – Ulttyq Akademııa da Almaty qalasynda ornalasqan.
«Ál-Farabıdiń 1150 jyldyq mereıtoıynyń resmı ashylýymen barshańyzdy quttyqtaımyn. Qandaı da bir halyqtyń ótkenin tarazylap, bolashaǵyna baǵdar jasap otyrýy – tabıǵı zańdylyq. Erteńin oılaǵan el ár tarıhı belesti artqa tastaǵannan keıin ýaqyt bederine salǵan óz tańbasyn, qaldyrǵan qundylyqtaryn udaıy baǵalap otyrýy tıis. Qazirgi álemdik qaýymdastyqpen tyǵyz aralasý barysynda biz ultymyzdyń eń basty qundylyqtary men tarıhı tulǵalaryn jańa qyrynan tanyp, olardy jurtshylyqqa keńinen nasıhattaý asa mańyzdy bolyp otyr. Bul úderis tek rýhanı kemeldený arqyly, ál-Farabı, ıAsaýı, Abaı syndy zamanynan ozyp týǵan danyshpandardyń eńbekterin jańasha baǵalap, solar aıqyndap bergen dańǵyl jolmen júrý arqyly ǵana júzege asady»,– deıdi Almaty qalasynyń ákimi Baqytjan Saǵyntaev.
Sonymen qatar, ol búgingi sharanyń basty sebepkeri – ortaǵasyrlyq ǵulama oıshyl, entsıklopedıst-ǵalym, fılosof Ábý Nasyr ál-Farabıdiń rýhanı murasy álemdik ǵylym men órkenıettiń damýyna ólsheýsiz úles qosqan bilimniń sarqylmaıtyn qaınar bulaǵy ekenin atap ótti.
«Eldigimiz ben ıntellektýaldyq áleýetimizdi álem jurtshylyǵyna pash etetin ǵulamanyń dál qazaq topyraǵynan shyqqany - bizder úshin zor maqtanysh. Onyń fılosofııalyq, logıkalyq, metafızıkalyq, áleýmettik, jaratylystaný ǵylym salalary boıynsha álemdik ǵylymǵa qosqan úlesiniń teńdesi joq»,– deıdi Saǵyntaev.
Sonymen qatar, qala basshysy Almatyda jyl boıy ál-Farabıge arnalǵan túrli is-sharalar ótetinin tilge tıek etti.
Ál-Farabıdiń 1150 jyldyq mereıtoıynyń resım ashylý saltanaty Almatydaǵy ál-Farabı atyndaǵy Qazaq Ulttyq ýnıversıtetinde ótip jatyr.