«Baqytty otbasy» ulttyq jobasy tanystyryldy
«Negizi, bul jobaǵa qatysty jumystardy biz partııa janynan qurylǵan balalar quqyǵyn qorǵaý keńesi aıasynda bastap ketken bolatynbyz. Endi, Elbasy, partııa Tóraǵasynyń tapsyrmasyna sáıkes, osy jumystardy jáne jergilikti ákimshilikter atqaryp jatqan jumysty júıelep, biriktirip, jańa ulttyq «Baqytty otbasy» jobasy aıasynda ótkizetin bolamyz», - dedi partııa xatshysy Tamara Dúısenova Astanada ótken jıynda.
Jobanyń negizgi maqsaty - qazaqstandyq otbasylar men balalardyń ál-aýqatyn arttyrý. Atalǵan maqsatqa jetýdiń úsh joly anyqtalyp otyr. Sonyń bári kezeń-kezeńmen iske asyrylady.
Partııa xatshysynyń aıtýynsha, fılıaldar memlekettik jáne jergilikti organdarmen birlese otyryp, qıyn jaǵdaıda otyrǵan otbasylardy anyqtaıdy. Ol úshin arnaıy toptar úılerdi aralaıdy. Sonyń bári xalyqtyń áleýmettik kartasynda kórsetiledi.
«Negizi, osy jumys jergilikti jerde bastalyp ketti. Partııa fılıaldary da atsalysyp jatyr. Sonyń negizinde kedeıshilik sheginen tómen otbasylarǵa kómek beriledi. Al ondaı otbasyda jumysqa jaramdy adamdar bolsa, olarǵa arnaıy oqý kýrstarynan ótýge, grant pen shaǵyn nesıe alýǵa usynys jasalady. Budan bólek, baspanaǵa zárý kópbalaly jáne tolyq emes otbasylarǵa arendalyq páterler beriledi. Bunyń barlyǵyn memlekettik jáne jergilikti atqarýshy organdar iske asyrady. Al partııa fılıaldary baqylaý jasaıdy», - deıdi T.Dúısenova.
Onyń sózine qaraǵanda, partııa fılıaldary óz kezeginde úkimettik emes uıymdardyń kómegimen qosymsha qoldaý sharalaryn uıymdastyrady. Máselen, ataýly kómekti alatyn otbasylardy anyqtaýmen qatar qıyn jaǵdaıǵa tap bolǵan otbasylar da esepke alynady. Olarǵa jan-jaqty quqyqtyq kómek kórsetiledi. Úıde otyryp, jumys jasaýǵa múmkindik jasalady.
«Búginde jergilikti atqarýshy organdardyń otbasylardy qoldaýǵa arnalǵan barlyq jobalary men partııa fılıaldarynyń sharalary «Baqytty otbasy» ulttyq jobasy aıasynda toptastyrylatyn bolady. Bul - ulttyq joba. Biz ony birlesip atqaratyn bolamyz», - dep atap kórsetti T.Dúısenov.
Aıta keteıik, búgingi jıynda Máýlen Áshimbaev partııa fılıaldarynyń kemshin tusyn atady.
«Máselen, Jaıyq ózenin alaıyq, jeltoqsan aıynan beri balyqtar qyryldy. Qazir osy másele ózekti problemaǵa aınaldy. Sonyń ishinde qoldan ósirilgen bekire tuqymdas balyqtar da bar. Bul - óte qymbat ónim. Sodan úlken shyǵyn keldi. Partııanyń Atyraý oblystyq fılıaly bolsa, osy máseleni memlekettik organdarǵa jetkizip, sarapshylardyń kómegimen naqty sebebin izdeýdiń ornyna ortalyqqa «bári jaqsy» dep xat jazyp otyr. «Senbilik kezinde bárin tazartyp tastaımyz» deıdi. Ondaı xat-xabarlardyń qajeti qansha? Máseleni sheshýmen aınalysý kerek. Aımaqta problema bolsa, ony der kezinde kóterip, memlekettik organdarǵa jetkizý kerek», - dedi M.Áshimbaev.