Baqytty otbasy: SQO-da byltyr 173 otbasy baspanaly boldy

PETROPAVL. QazAqparat – Soltústik Qazaqstan oblysynda «Baqytty otbasy» memlekettik baǵdarlamasy boıynsha baspanaǵa muqtaj jandarǵa joldamalar berile bastady, dep habarlaıdy QazAqparat tilshisi.

Búgin óńirlik kommýnıkatsııalar qyzmetinde «Qazaqstannyń turǵyn úı-qurylys jınaq banki» AQ SQOF ókilderi brıfıng ótkizip, «Baqytty otbasy» baǵdarlamasyna qatysty málimetpen bólisti.

Mamandardyń aıtýynsha, bıyl bul baǵdarlamaǵa bólingen qarajat eki ese artyp, 100 mlrd teńgeni qurady. Nátıjesinde 10 myń otbasynyń baspanaly bolý múmkindigi bar. Bıyl SQO-da 144 januıa osy baǵdarlamanyń sharapatyn kórmek.

«Nesıeniń mólsherlemesi ózgerissiz qaldy – 2%. Bıyl tek kiristiń joǵary mólsheri ózgertildi. Endi ol kúnkóris mınımýmynyń shamasymen esepteledi. Endi jeńildetilgen nesıe alý úshin otbasynyń bir múshesiniń sońǵy jarty jyldaǵy tabysy aıyna eki kúnkóris deńgeıinen, ıaǵnı 62 366 teńgeden aspaýy kerek. Nátıjesinde, baǵdarlamaǵa qatysýshylardyń sany artpaq», - deıdi «Qazaqstannyń turǵyn úı-qurylys jınaq banki» AQ SQOF bıznesti damytý bóliminiń bastyǵy Ámir Nurmuqanov.

Baǵdarlamaǵa qatysý úshin qajetti qujattardy turǵyn úı-kommýnaldyq sharýashylyq bólimine tapsyryp, joldama alý qajet. Bank qujattaryn bekitken jaǵdaıda Nur-Sultan, Almaty, Atyraý, Aqtaý jáne Shymkent qalalarynyń turǵyndary 15 mln teńgege deıin, al basqa óńirlerdiń turǵyndary 10 mln teńgege deıin nesıe ala alady.

«Byltyr 173 úıelmen «Baqytty otbasy» baǵdarlamasy boıynsha qonys toıyn toılady. Taǵy jeteýiniń nesıe ótinishteri oń sheshim aldy. Qazir olar óz páterin izdep jatyr», - deıdi Ámir Nurmuqanov.

Jalpy «Qazaqstannyń turǵyn úı-qurylys jınaq banki» AQ SQOF 47 myńnan astam salymshysy bar. Depozıttik portfel - 25 mlrd teńge.