«Baqytty otbasy» kópbalaly analardyń iskerlik belsendiliginiń ortalyǵyna aınaldy - Saǵyntaev

ALMATY. QazAqparat - Almaty ákimi Baqytjan Saǵyntaev ómirlik qıyn jaǵdaıǵa tap bolǵan áıelderdi áleýmettik qoldaý ortalyqtarynyń ózgertetini týraly aıtty, dep habarlaıdy QazAqparat tilshisi.

Ákim Instagram paraqshasynda byltyr ár aýdanda «Baqytty otbasy» áleýmettik qoldaý ortalyqtaryn ashý basty maqsat bolǵanyn eske saldy. Munda áıelder arasyndaǵy kásipkerlikti damytýǵa basa nazar aýdaryldy. Іs júzinde olar kópbalaly analarǵa arnalǵan iskerlik belsendiliktiń ortalyǵyna aınalýy tıis boldy.

«Isker Ana baǵdarlamasy boıynsha bıznes daǵdylaryna úıretýdi bastap, ınnovatsııalyq jobalardy iske qosý úshin granttar usyndyq. Aqmaral Basırova qurǵan Alataý aýdanynyń «Baqytty otbasy» ortalyǵy bir jyldyń ishinde Almatynyń ózge aýdandary úshin ǵana emes, elimizdiń basqa óńirleri úshin de úlgi bola bildi», - dep jazdy B. Saǵyntaev.

Onyń aıtýy boıynsha munda áıelderge tek keńes berilip qana qoımaıdy. Qıyn jaǵdaıǵa tap bolǵan áıelderdiń ózderine qaıta senýine, ózderine unaıtyn nárseni tańdap, ómir saltyn tolyǵymen ózgertýlerine kómektesedi. Analar óz mysalynda balalarǵa óz eńbegimen aqsha tabýǵa bolatynyn kórsetedi. Kún saıyn munda 150-ge jýyq áıel keledi. Bir jyldyń ishinde 25 myń áıel 31 baǵyt boıynsha túrli kýrstarda bilim aldy.

Almaty ákimi bir jyl buryn ortalyqqa bapker retinde kelgen Móldir Júnisbekovanyń ómirin mysalǵa keltirdi. Ol 500-ge jýyq áıeldi oqytsa, sonyń 200-i búgin jumys tapty. Tipti olar jańa jumys oryndaryn qurýda.

«BJK-2025» boıynsha 2,5 mln teńge kóleminde grantqa ıe bolǵan Móldir 10 áıel eńbek ete alatyn tigin tsehyna arnalǵan jabdyqty satyp aldy.

Bıyl jyl basynan beri Alataý aýdanynyń «Baqytty otbasy» ortalyǵynda 27 myń áıelge «Іsker ana» baǵdarlamasy boıynsha aqparattyq-konsýltatsııalyq-resýrstyq qoldaý kórsetildi. Trenıngter men kýrstarda 25 myń adam oqydy.

Sonymen qatar, «Bıznes Bastaý» baǵdarlamasy boıynsha 537 áıel bilimderin jetildirdi. Olardyń 300-i grant alyp, kıim jóndeý, kondıter, shashtaraz, manıkıýr salondaryn ashty, balalardyń damý kitaptaryn jasap, avtokólik muqabalaryn tigip jáne basqa da salalar boıynsha ózderiniń kásipterin bastady.

Eki áıel «Bıznestiń jol kartasy-2025» aıasynda ınnovatsııalyq jobalardy iske asyrýǵa 2-den 5 mıllıon teńgege deıin memlekettik grant aldy. Óndiris sheberhanalaryn ashý úshin alańdar berilip, al ónimderin satý úshin bazarlardan 50-ge jýyq oryn bólingen.