«Baqytty otbasy» áleýmettik ortalyqtary jumysyn jalǵastyrady

NUR-SULTAN. QazAqparat – Qıyn jaǵdaıǵa tap bolǵan analardyń tabysyn arttyrý úshin Qazaqstanda «Baqytty otbasy» áleýmettik ortalyqtaryn damytý jumystary jalǵasady.

Bul týraly Qazaqstan halqy Assambleıasy Analar keńesiniń tóraǵasy Nazıpa Shanaı aıtty, dep habarlaıdy QazAqparat tilshisi.

«Qazirgi ýaqytta Úkimet bul baǵytty halyqtyń tabysyn arttyrý baǵdarlamasyna engizip jatyr», - dedi ol QHA respýblıkalyq Analar keńesiniń otyrysynda.

Onyń aıtýynsha, atalǵan sharalar Qazaqstannyń isker áıelderi qaýymdastyǵy men tabysty analardyń qatysýymen Kásibı daıarlaý jáne qaıta daıarlaý ortalyqtarynda ótedi. Osylaısha, motıvatsııalyq kezdesýler toptamasy, tulǵalyq ósý boıynsha sheberlik synyptary, trenıngter, semınarlar men koých-sessııalar uıymdastyrylady. Munyń bári naqty áleýmettik nátıjelerge qol jetkizip, jeke jáne iskerlik qasıetter men kásibı daǵdylardy damytýǵa baǵyttalǵan.

Sonymen birge, N.Shanaı «Baqytty otbasy» ortalyqtary qıyn jaǵdaıdaǵy analarǵa kómektesýge baǵyttalǵanyn eske saldy. Qazaqstan boıynsha barlyq 17 oblys ortalyǵy men iri qalalardaǵy aýdandardy qosa alǵanda, osyndaı 34 ortalyq jumys isteıdi. Mysaly, Almatyda toǵyz «Baqytty otbasy» ortalyǵy bar.

Aıta keteıik, elordada Qazaqstan halqy Assambleıasynyń respýblıkalyq Analar keńesiniń otyrysy ótti. Jıynda «Mádenıetti ana – mádenıetti ult» respýblıkalyq jobasy tanystyryldy.