Baqytgúl Hamenovanyń soty: basqarma basshysy oǵan jala japqanyn aıtty

ATYRAÝ. QazAqparat – Atyraýda oblys ákiminiń burynǵy orynbasary Baqytgúl Hamenovanyń isine qatysty sot qaıta jalǵasty. Sottyń kezekti otyrysynda oblystyq mádenıet, tilderdi damytý jáne arhıv isi basqarmasynyń basshysy Aqylbek Rysqalıev tergeý kezindegi bastapqy sózinen bas tartty, dep habarlaıdy QazAqparat tilshisi.

«Men tergeýde jaýap bergen kezde eseńgirep, qatty kúızeliste boldym. Sol kezde Antıkor qyzmetkerleriniń biri kelip, bul qarjy oblys ákiminiń orynbasary Baqytgúl Hamenovaǵa arnalǵan dep kórsetip berý kerek ekenimdi aıtty. Eger men osylaı kórsetsem, qorǵalý quqyǵy bar kýá bolyp qalatynymdy túsindirdi. Bul úshin jaýapkershilikke tartylmaıtynymdy eskertti. Antıkor qyzmetkeriniń naqty kim ekenin aıta almaımyn, olardy tanymaımyn», - dedi Aqylbek Rysqalıev.

Oblystyq sottyń baspasóz qyzmetinen málim etkendeı, Baqytgúl Hamenovanyń isi Atyraýdaǵy №2 qalalyq sotta qaralyp jatyr. Aıyptaý aktisi 55 betten turady.

Eske salsaq, bıylǵy 26 mamyrda Atyraý qalasynyń №2 sotyna QR Qylmystyq kodeksi 366-babynyń 3-bóligi 2-tarmaǵymen Atyraý oblysy ákiminiń orynbasary Baqytgúl Hamenovaǵa, Atyraý oblysy Mádenıet, tilderdi damytý jáne arhıv isi basqarmasynyń basshysy Aqylbek Rysqalıevke, QR Qylmystyq kodesi 367-babynyń 2-bóligimen «B» JShS dırektoryna qatysty qylmystyq is tústi.

14 maýsymǵa belgilengen sot protsesi birneshe ret keıinge qaldyrylyp, 11 tamyzda bastaldy.

Baqytgúl Hamenova sotta ózine taǵylǵan aıypty moıyndaǵan joq.

Buǵan deıin, ıaǵnı 3 tamyzda aıyptalýshy oblys ákiminiń orynbasary laýazymynan bosatylǵan.

Sot otyrysy 6 qyrkúıekte qaıta jalǵasty.

Baqytgúl Hamenova sot otyrysynda jibergen qateligi týraly aıtty.

Sondaı-aq, Antıkor Hamenovaǵa qatysty málimdeme jasady.