Baqytgúl Hamenova isi: Basqarma basshysy men JShS dırektorynyń jazasy jeńildedi

ATYRAÝ. QazAqparat – Eks-sheneýnik Baqytgúl Hamenovamen birge tergelgen basqarma basshysy men seriktestik dırektoryna qatysty sot úkimi ózgerdi. Olarǵa taǵaıyndalǵan burynǵy jaza merzimi tómendetildi, dep habarlaıdy QazAqparat tilshisi.

Atyraý oblystyq sotynyń baspasóz qyzmetinen málim etkendeı, oblys ákiminiń burynǵy orynbasary B.Hamenova jáne oblystyq mádenıet, tilderdi damytý jáne arhıv isi basqarmasynyń burynǵy basshysy A.Rysqalıevke, «Balqytý» JShS dırektory Ý.Adamovqa qatysty qylmystyq is Atyraý oblystyq sotynyń apellıatsııalyq alqasynda qaıta qaraldy.

Qylmystyq ister jónindegi sot alqasynyń sheshimimen A.Rysqalıevtiń áreketi QR Qylmystyq kodeksiniń 28-baptyń 5-bóligine, 366-babynyń 3-bóliginiń 2-tarmaǵyna para alýǵa járdemdesý retinde qaıta dárejelendi.

«Asylbek Rysqalıevtiń jaýapkershiligin edáýir jeńildetetin jaǵdaı retinde qylmystyń ashylýyna yqpal etkeni, qylmystyń basqa da qatysýshylaryn áshkereleýi, asyraýynda 4 jas balasy bar eskerildi. Oǵan taǵaıyndalǵan jaza Qylmystyq kodekstiń 55-babynyń 4-bóligimen 2 jylǵa deıin bas bostandyǵynan aıyrýǵa aýystyryldy. Ý.Adamovtyń egde jasy (65 jasta), asyraýynda tórt jáne kámeletke tolmaǵan 3 balasy bar, kámeletke tolǵan bala kezinen múgedek eki balanyń bar ekeni eskerilip, jaza merzimi ózgeredi. Ol QR Qylmystyq kodeksi 55-babynyń 4-bóligimen 1 jyl 6 aıǵa deıin bas bostandyǵynan aıyrylady», -dep habarlady oblystyq sottyń baspasóz qyzmeti.

Al jeti jylǵa bas bostandyǵynan aıyrylǵan Baqytgúl Hamenovanyń jazasy sol kúıinde qaldy.

Eske sala ketelik, budan buryn Hamenovanyń isine qatysy bar basqarma basshysy - 7, seriktestik dırektory 4 jylǵa sottalǵanyn jazǵan edik.

Sot úkimi byltyrǵy 15 qarashada shyqqan.