Baqytgúl Hamenova bir apta buryn oblys ákiminiń orynbasary laýazymynan bosatylǵan
Oblys ákiminiń baspasóz qyzmeti bul derekti rastady.
Baspasóz qyzmetiniń málimetinshe, Atyraý oblysynyń ákimi Baqytgúl Hamenovany atqaratyn laýazymynan bosatý týraly ókimge 2022 jylǵy 3 tamyzda qol qoıylǵan.
«Hamenova Baqytgúl Qaıyrjanqyzy Qazaqstan Respýblıkasynyń 2015 jylǵy 23 qarashadaǵy «Qazaqstan Respýblıkasynyń memlekettik qyzmeti týraly» Zańynyń 59-babynyń 9-tarmaqshasyna sáıkes memlekettik saıası qyzmetshini ol atqaratyn laýazymǵa taǵaıyndaý (saılaý) quqyǵy berilgen laýazymdy adamnyń (organ) tıisti sheshimi boıynsha QR Prezıdenti Ákimshiliginiń kelisimimen oblys ákiminiń 2022 jylǵy 3 tamyzdaǵy №267-ó ókimimen atqaratyn laýazymynan bosatyldy», - dep habarlady ákimniń baspasóz qyzmetinen.
Baqytgúl Hamenova Atyraý oblysy ákiminiń orynbasary laýazymyna 2020 jylǵy 13 naýryzda taǵaıyndalǵan.
Atyraý oblysy ákiminiń orynbasary qyzmetin atqarǵan Baqytgúl Hamenova Abaı eskertkishin ornatýǵa bólingen qarajattan para aldy degen kúdikpen ustaldy. Ol byltyrǵy jeltoqsan aıynda ustalyp, tergeý ızolıatoryna qamaýǵa alyndy.
Búgin, 11 tamyzda Atyraýdaǵy №2 qalalyq sotta Baqytgúl Hamenovaǵa qatysty otyrys ótip jatyr.
Baqytgúl Hamenova men Aqylbek Rysqalıevtiń isi QR Qylmystyq kodeksiniń 366-baby 3-bóliginiń 3-tarmaǵymen tergelgen. Al, «Balqytý» JShS dırektory Ómirtaı Adamov QR Qylmystyq kodeksiniń 367-baby 2-bóligimen tergeýge alynǵan.
Sotta Baqytgúl Hamenova ózine taǵylǵan aıypty moıyndaǵan joq.
Al, onyń advokaty Baqytgúl Hamenovany úı qamaǵyna aýystyrýdy surady.
Sot advokattyń ótinishine qatysty ázirge naqty sheshim shyǵarǵan joq.