Baqytbek Smaǵul: Jastardy áskerge kósheden ustap alyp ketý – uıat nárse

NUR-SULTAN. QazAqparat – Májilis depýtaty Baqytbek Smaǵul jastardy áskerge májbúrlep áketý jóninde óz pikirin bildirdi, dep habarlaıdy QazAqparat tilshisi.

«Qazaqstannyń Qarýly Kúshteri qansha aqtalsa da, jalpy qoǵamdy mundaı uıatty jaǵdaıdy qalyptastyrýǵa bolmaıdy. Áskerı komıssarıattardyń shaqyrý qaǵazy bolsyn, aldyn ala taratsyn, adamdardy kósheden ustap, emtıhan tapsyrǵandardy súıreleýi – uıat nárse. Áskerge sol azamattardyń qyzyǵýshylyǵyn, qushtarlyǵyn oıatýymyz kerek, Otanǵa degen súıispenshilikti syldyr sózben emes, móldir sezimmen, júrek kózimen kóretindeı jastarǵa nasıhattaýymyz kerek», - dedi B. Smaǵul

Depýtattyń aıtýynsha, áskerı jýrnalıster Qarýly Kúshter jasaǵan erlikterdi kóptep nasıhattaǵany jón, áskerı salanyń jaqsy jaǵyn da kórsete bilý kerek.

«Áskerdegi kóptegen keleńsiz jaǵdaılar men máselelerdi túbegeıli sheship, úlken ózgerister jasaýymyz kerek. Áskerdi, Otanǵa degen qurmetti, mahabatty oıatý kerek. Kásibı áskerdi de naqty suryptaý kerek. Áleýmettik qamtylýy taǵy bar. Sondyqtan áskerge erekshe mán berý kerek. Óıtkeni, áskeri qaýqarsyz el jaltaq bolady. Áskerı jazalar da qatań oryndalýǵa tıisti, sonda ǵana ózimizdi suryptaı alamyz. Kelip jatqan serjanttar da, olardyń daıyndyqtary da álemdik deńgeıdegi talaptarǵa saı bolýy kerek», - dedi Baqytbek Smaǵul.

Aıta keteıik, buǵan deıin Qorǵanys mınıstrligi áskerge barýdan qashqan stýdentterdiń vıdeosyna pikir bildirgen edi.