Baqyt Sultanovtyń «Nur Otan»-daǵy qabyldaýy: Azamattar qandaı másele kóterdi

NUR-SULTAN. QazAqparat - Búgin QR Saýda jáne ıntegratsııa mınıstri Baqyt Sultanov «Nur Otan» partııasynyń respýblıkalyq qoǵamdyq qabyldaýynda birqatar azamatty qabyldady, dep habarlaıdy QazAqparat tilshisi.

Aldymen «Hanter» JShS-niń kommertsııalyq dırektory Nurseıit Shorabekov Qaraǵandy oblysynda kólikterge gaz quıatyn stansasy bar ekendigin, alaıda qarasha aıynan beri ákimdik tarapynan áleýmettik gazdy ala almaı otyrǵandyǵyn aıtyp, mınıstrge shaǵymdandy.

«Jergilikti atqarýshy organdarǵa hat jazyp suraǵan edik. Mardymdy jaýap ala almadyq. Bir aıdan astam ýaqyt ótti. Jumys toqtap tur, jumysshylarymyzdyń jalaqysyn bere almaı, shyǵynǵa da batyp otyrmyz», - dedi ol.

Qoǵamdyq qabyldaýǵa arnaıy kelgen QR EM Gaz ónerkásibin damytý departamenti dırektorynyń orynbasary Qýanysh Sársekeev osy máselege túsinikteme berip, bul túıtkildiń dál búgin tolyqtaı sheshilgendigin Qaraǵandy oblysynyń ákimdigi áleýmettik gaz alatyn kompanııalar tizimine «Hanter» JShS-in qosqandyǵyn aıtty.

«Bul máseleni »Nur Otan« partııasymen birge baqylaýǵa alamyz. Qaraǵandy oblysynyń ákimdiginiń tıisti qyzmetterine habarlasyp, máseleni anyqtaımyz. Másele sheshilse de baqylaýǵa alatyn bolamyz», - dedi Baqyt Sultanov.

Kelesi mınıstrdiń aldyna kelgen elordalyq úshinshi toptaǵy múgedek Marat Beısenbaev birneshe jyldan beri aıaq kıim tigetin sheberhana ashý úshin oryn suraǵanymen taýy shaǵylyp júrgendigin aıtty.

«4-5 jyldan beri aıaq kıim tigetin sheberhana ashý úshin oryn surap júrmin. Qala ákiminiń orynbasaryna, »Atamekenge«, Áleýmettik-kásipkerlik korporatsııasyna barǵanymmen nátıje joq. Áne-mine deýmen ýaqytym ótti», - dedi Marat Beısenbaev.

Osyǵan oraı Baqyt Sultanov «1000 saýda orny» jobasynyń jetekshisi Seken Ádilbekovpen atalǵan máselege oraı túsinikteme berýin suraǵan edi. Joba jetekshisiniń aıtýynsha, Marat Beısenbaevtyń ótinishi, qujattary qaralyp rásimdelgennen keıin «Atameken» kásipkerler palatasyna berilgen. Endi máselesi 22 qarasha kúni qaralyp sheshilmek.

«Marat Sándibekuly, joba jetekshisi máseleniń sheshiletindigin aıtyp otyr. Bizde ony »Nur Otan« partııasy fılıalymen birge baqylaýǵa alamyz jáne jumaǵa deıin jaýabyn alyp qalarsyz. Eger jumaǵa jaýaby bolmasa maǵan habarlasyp aıtyńyz. Sheshemiz. Jeke baqylaýyma alamyn», - dedi Baqyt Sultanov.