Baqyt Sultanov Jastar jylynda qandaı jumystar atqarylatynyn aıtty
«Barshańyzǵa málim, Memleket basshysy jaqynda ǵana Jastar jylyn saltanatty túrde ashyp berdi. Onda Elbasy «Táýelsizdikpen ósip kele jatqan búgingi jas býyn bizdiń erteńgi senimdi tiregimiz» degen jaqsy sóz aıtty. Jastarǵa jol ashatyn jaqsy tetikterdi jarııalap, Úkimet pen atqarýshy organdarǵa naqty tapsyrmalar berdi. Endi ony júzege asyrý úshin jumysqa kirisýimiz qajet», - dedi keńes barysynda Baqyt Sultanov.
Qala basshysy Jastar jylyna oraı arnaıy Jol kartasynyń ázirlenip, bekitilgendigin atap ótti. Densaýlyq saqtaý, bilim berý, jastardy áleýmettik qamtý salalarynda aldaǵy ýaqytta atqarylatyn sharalarǵa keńinen toqtaldy.
Astana qalasy ákimdiginiń málimetinshe, Jastar jylyna oraı 11 baǵytty qamtıtyn Jol kartasy ázirlengen. Osyǵan oraı Astana qalasy ákimdiginiń «Astana jastary» mekemesi elordalyq jastarǵa qoldaý kórsetetin 2019 qysqa nómirine qońyraý shalý ortalyǵy retinde jumys isteıtin bolady. Sonymen qatar, ol Jol kartasyndaǵy barlyq 11 baǵyt boıynsha jastarǵa keńes beredi. Jol kartasy 100 jobany jáne 600-den astam is-sharany júzege asyrýdy kózdeıdi.