Baqyt Sultanov úleskerler problemasy jaıynda: Ońaı bolmaıdy

ASTANA. QazAqparat - 2022 jyly elordadaǵy úleskerler problemasy tolyqtaı sheshiledi. Bul týraly búgin qala halqynyń aldynda esep berip jatqan Astana ákimi Baqyt Sultanov málim etti, dep habarlaıdy QazAqparat tilshisi.

«Bul másele meniń jeke baqylaýymda. Biz vedomstvoaralyq komıssııa aıasynda aldanyp qalǵan úleskerlermen turaqty kezdesý ótkizemiz. Buǵan deıin aıtqanymdaı, keı jerde qalaǵanymyzdaı jyldam bolmasa da, bul problemalardy naqty sheship jatyrmyz», - dedi qala basshysy.

Onyń atap ótýinshe, qabyldanǵan sharalardyń nátıjesinde qalada problemaly nysandardyń sany 68-den 29-ǵa deıin qysqardy. Nátıjesinde 10344 úleskerdiń problemasy sheshildi.

«Biz qalǵandary boıynsha Jol kartasyn ázirledik. Josparymyz - 2022 jylǵa deıin qalǵan problemany túbegeıli sheshý, qala tarıhyndaǵy kóńilge qaıaý túsiretin paraǵyn eńserý. Bul jerde ońaı bolmaıtyndyǵyn túsiný qajet. Memleketten qarajat bólindi. Biraq, birden aıtaıyn, bul qaıtarylatyn qarajat. Jumys júrgizilip jatyr. Tabysty sátter kóp, jumys ta jetkilikti. Degenmen, taǵy da qaıtalap aıtamyn, úleskerlik qurylys erekshe baqylaýda tur»,- dedi B.Sultanov.