Baqyt Sultanov Ýkraınanyń joǵarǵy laýazymdy tulǵalarymen kezdesti

NUR-SULTAN. QazAqparat - Qazaqstan Respýblıkasynyń Saýda jáne ıntegratsııa mınıstri Baqyt Sultanovtyń Ýkraınaǵa jumys sapary aıasynda Ýkraınanyń joǵarǵy laýazymdy tulǵalary men birqatar kezdesýler ótkizildi, dep habarlaıdy QazAqparat Qazaqstannyń Ýkraınadaǵy elshiliginiń resmı saıtyna silteme jasap.

Ýkraınanyń Premer-mınıstri Denıs Shmygalmen suhbat barysynda eki jaqty yntymaqtastyq máseleleriniń keń aýqymy talqylandy.

Taraptar saýda men kooperatsııalyq yntymaqtastyqtyń ózara is-qımylyn odan ári damytý úshin kóptegen ortaq joldardyń bolýyn atap ótti. Buǵan Ekonomıkalyq yntymaqtastyq jónindegi birlesken qazaqstan-ýkraına memleketaralyq komıssııasynyń 14-otyrysynyń qorytyndylary dálel bola alady. Óz kezeginde, Komıssııa otyrysynyń nátıjesinde qol qoıylǵan Hattama, is júzinde, birlesken is-qımyldardyń egjeı-tegjeıli «jol kartasy» bolyp tabylady.

Taraptar qol jetkizilgen ýaǵdalastyqtardyń oryndalýyn baqylaýdy qamtamasyz etýge, sondaı-aq, úkimetaralyq jáne vedomstvoaralyq baılanystardyń dınamıkasyn júıeli negizde qoldap turýǵa kelisti.

«Bizdiń úkimetter arasyndaǵy tyǵyz ózara is-qımyl eki eldiń ekonomıkalyq kórsetkishteriniń odan ári ósýine oń áserin tıgizetinine senimdimin», - dep paıymdady Denıs Shmygal.

Ýkraınanyń vıtse-premer-mınıstri - Tsıfrlyq transformatsııa mınıstri Mıhaıl Fedorovpen tsıfrlandyrý jáne IT qyzmetterin usyný salasyndaǵy ózara is-qımyl máseleleri talqylandy.

M.Fedorov Qazaqstannyń halyqqa jáne bızneske memlekettik qyzmetter kórsetý maqsatynda tsıfrlyq tehnologııalardy engizý salasyndaǵy jetistikterin joǵary baǵalady. Ýkraınalyq ІT-mamandardyń joǵary quzyrettiligin eskere otyryp, suhbattasýshylarmen osy saladaǵy ekijaqty yntymaqtastyqty damytýdyń eleýli áleýeti atap ótildi.

Ýkraınanyń Vıtse-premer-mınıstri perspektıvalyq jobalardy túbegeıli pysyqtaý jáne memlekettik qyzmetterdi tsıfrlyq formatta kórsetý boıynsha tájirıbe almasý maqsatynda Qazaqstanǵa kelýge shaqyrýdy qabyldaı otyryp, «Bir-birimizben bólisetin aıtarlyqtaı tájirıbemiz bar», - dep atap ótti.

B.Sultanov koronavırýs pandemııasyna qarsy kúrestiń aldaǵy sharalaryn talqylaý maqsatynda Ýkraınanyń Densaýlyq saqtaý mınıstri Vıktor Lıajkomen de kelissózder júrgizdi.

Eki memleket arasyndaǵy turaqty áýe qatynastarynyń qalpyna kelýin jáne elder azamattarynyń iskerlik belsendiliginiń ulǵaıǵanyn eskere otyryp, taraptar COVID-19-ǵa qarsy vaktsınatsııa pasportyn/sertıfıkatyn ózara taný máselelerin pysyqtaýǵa kelisti.

Qazaqstan tarapy óziniń QazVac vaktsınasyn ázirlep, óndire bastaǵany týraly habarlady. Bul rette, ony Ýkraınaǵa jetkizýge, qajetilik bolǵan jaǵdaıda gýmanıtarlyq kómek retinde berýge de daıyndyǵyn rastady.

Qazaqstandyq mınıstr koronavırýstyń taralýynyń alǵashqy kúnderinen bastap Qazaqstan arqyly tranzıtpen (Qazaqstan qalalaryna tehnıkalyq qonýmen) Qytaıdan Ýkraınaǵa gýmanıtarlyq kómek jetkizýde taraptar tıimdi yntymaqtastyq ornatqanyn atap ótti.