Baqyt Sultanov: Óńir ákimdikteri turaqtandyrý qorlaryn jiti baqylaýǵa alýy kerek

NUR-SULTAN. QazAqparat – Saýda jáne ıntegratsııa mınıstri Baqyt Sultanov aımaqtardaǵy turaqtandyrý qorlarynyń jumysy boıynsha jergilikti atqarýshy organdardyń jaýapkershiligi byltyrdan qaraǵanda salmaqty bolatynyn eske saldy, dep habarlaıdy QazAqparat tilshisi.

«Aımaqtardaǵy turaqtandyrý qorlary týraly aıtar bolsaq, jergilikti atqarýshy organdar taýsylýy múmkin azyq-túlik túrleri boıynsha máseleni ýaqtyly sheshýi tıis. Jergilikti atqarýshy organdar bul rette azyq-túlik túrlerine taldaý jasaýy kerek. Qajettiligi joǵyn satyp alýdyń keregi joq. Aýyl sharýashylyǵy mınıstri aıtqandaı, keı kezde óndiris pen suranystyń ara-jigi uzaryp ketedi», - dedi Baqyt Sultanov OKQ-da ótken baspasóz máslıhatynda.

Onyń aıtýynsha, byltyr qaraqumyq tapshylyǵy týyndap, keıbir óńirdiń bıligi naryqtaǵy bul trendter men ózgeristerdi baıqamaı qalǵan.

«Turaqtandyrý qorlary boıynsha jergilikti atqarýshy organdar jumys júrgizýde. Bul rette olarda jaýapkershilik bar. Byltyr toǵyz aıdyń qorytyndysy boıynsha alty óńirde bul máseleni jetkilikti deńgeıde baqylaýǵa almaǵan ákimderdiń orynbasarlary jazalanǵan edi. Bıyl jaýapkershilik júgi odan da salmaqty», - dedi ol.

Eske sala ketsek, buǵan deıin atalmysh baspasóz máslıhatynda Baqyt Sultanov koronavırýs ınfektsııasyna baılanysty sýpermarketter men bazarlarda týyndaǵan dúrbeleńge baılanysty qazaqstandyqtardy sabyrǵa shaqyrǵan bolatyn.