Baqyt Sultanov memlekettik satyp alý zańnamasyn kóp burmalaıtyn óńirlerdi atady

ASTANA. QazAqparat - Aǵymdaǵy jyldyń qańtar-maýsymynda 726 mlrd teńge bıýdjet qarajaty aýdıtorlyq sharalarmen qamtyldy. Bul týraly búgin Úkimet otyrysynda 6 aıdaǵy memlekettik bıýdjettiń atqarylý qorytyndylaryn shyǵarǵan Qarjy mınıstri Baqyt Sultanov aıtty, dep habarlaıdy QazAqparat tilshisi.

«Esepti kezeńde 726 mlrd teńge bıýdjet qarajaty aýdıtorlyq sharalarmen qamtyldy. 60 mlrd teńgege qarjylyq zańbuzýshylyqtar anyqtaldy. Tekserý kezinde anyqtalǵan zańbuzýshylyqtardyń 48,8 mlrd teńgesi qalpyna keltirildi», - dedi ol.

Mınıstrdiń aıtýynsha, memlekettik satyp alýdyń rásimderi kúndelikti kameraldyq baqylaýda.

1 shildege jalpy somasy 4 trln 514 mlrd teńge bolatyn 315 myń satyp alý rásimderi qadaǵalandy. Nátıjesinde 18 myń 278 protsedýralar boıynsha 423 mlrd teńgege zańbuzýshylyqtar anyqtaldy.

«Memlekettik satyp alý zańnamasyn kóp burmalaıtyn óńirler: Aqmola oblysy - 59,5 mlrd teńge, Qaraǵandy - 55 mlrd teńge, Astana qalasy - 50 mlrd teńge, Aqtóbe jáne Ońtústik Qazaqstan oblystary 29 mlrd teńgeden. Nysandarǵa jiberilgen habarlamalar arqyly 357 mlrd teńgege zańbuzýshylyqtar joıyldy. Bul jerde aıta keterligi, eshqandaı konkýrstar toqtatylmady», - dep atap ótti Sultanov.

 

Foto: primeminister.kz