Baqyt Sultanov bıýdjet qarajatyn ıgere almaǵan mınıstrlikterdi atady

ASTANA. QazAqparat - 2018 jyldyń 8 aıynda 80,7 mlrd teńge bıýdjet qarajaty ıgerilgen joq. Bul týraly búgin Úkimettiń selektorlyq rejimdegi otyrysynda QR Qarjy mınıstri Baqyt Sultanov aıtty. Bul onyń Astana ákimi qyzmetine taǵaıyndalardyń aldyndaǵy mınıstr retindegi sońǵy baıandamasy bolatyn, dep habarlaıdy QazAqparat tilshisi.

«Respýblıkalyq bıýdjettiń shyǵystary 6 trln 277 mlrd teńgeni qurady. Ótken jyldyń osyndaı kezeńimen salystyrǵanda bıýdjettik tártip jaqsardy. Atqarylmaǵany - 91 mlrd teńge, onyń ishinde bıýdjet qarajatynyń únemdelýi - 10,3 mlrd teńge. Igerilmeý somasy - 80,7 mlrd teńge. Bul 2017 jyldyń 8 aıyndaǵy kórsetkishke qaraǵanda 21 mlrd teńgege az»,-  dedi mınıstr.

Onyń dereginshe, Qorǵanys mınıstrligi 15,4 mlrd teńge, Mádenıet jáne sport mınıstrligi 11,1 mlrd teńge, Aýyl sharýashylyǵy mınıstrligi 10, 9 mlrd teńge, Іshki ister mınıstrligi 9,5 mlrd teńge ıgermegen.

«Aldynda baıandaǵanymyzdaı ıgerilmeý somasynyń bir bóligi bıýdjetti naqtylaý kezinde qaıta bólinetin bolady. Jergilikti bıýdjetter shyǵystary 3 trln 74 mlrd teńgeni qurady. Atqarylmaǵany - 69,6 mlrd teńge. Bul kórsetkish ótken jyldyń uqsas kezeńimen salystyrǵanda biraz jaqsardy», - dedi ol.

Baqyt Sultanovtyń aıtýynsha, esepti kezeńde óńirlerge 448,8 mlrd teńge nysanaly transfertter bólindi. Olar jergilikti deńgeıde 94,5 paıyz, nemese 423,9 mlrd teńge ıgerildi.

24,9 mlrd teńge atqarylmady, onyń ishinde 2,4 mlrd teńge bıýdjet qarajatyn únemdeý boldy.

«22,5 mlrd teńge ıgerilgen joq, ol ótken jyldyń uqsas kezeńindegi ıgerilmeý somasynan 44,6 paıyzǵa az», - dedi B. Sultanov.

Eske sala ketsek, QR Prezıdentiniń Jarlyǵymen Baqyt Sultanov Astana qalasynyń ákimi bolyp taǵaıyndaldy.