Baqyt Sultanov azyq-túlik baǵasyn arnaıy platforma arqyly qadaǵalaýdy usyndy

NUR-SULTAN. QazAqparat – QR Premer-Mınıstriniń orynbasary –Saýda jáne ıntegratsııa mınıstri Baqyt Sultanov azyq-túlik baǵasyn baqylaýǵa arnalǵan jańa platforma iske qosylatynyn jetkizdi, dep habarlaıdy QazAqparat tilshisi.

«Memleket basshynyń tapsyrmasy aıasynda Úkimet jyl aıaǵyna deıin otandyq aýyl sharýashylyǵy óndirýshileriniń ónimderin iri saýda jelilerine jetkizýdi qoldaýǵa baǵyttalǵan zańnamalyq bastamalardy usynbaq. Mysaly, sórelerge qoljetimdilikti qamtamasyz etý, ústemeaqy shegin retteý jáne deldaldar sanyn azaıtý sharalary pysyqtalady», - dedi ol ortalyq kommýnıkatsııalar qyzmetinde ótken brıfıngte.

Sondaı-aq, mınıstr Qdate analıtıkalyq platformasynyń ne úshin qurylyp jatqanyn túsindirdi.

«Ol ishki saýdanyń jaı-kúıine, ınfraqurylym júktemesine, ımport-eksport dınamıkasyna, taýarlar men qyzmetter baǵasynyń ózgerýine taldaý men monıtorıng jasap, memlekettik organdarǵa sapaly analıtıka usynady. Bul taldaýlardyń bári ashyq jarııalanady. Sonyń arqasynda bızneste ádil báseke qalyptasyp, tutynýshylarǵa sapaly ónimdi qoljetimdi baǵamen alý múmkindigi týady», - dedi Baqyt Sultanov.

Eske salsaq, Úkimettiń keńeıtilgen otyrysynda Memleket basshysy Qasym-Jomart Toqaev qant tapshylyǵyn retteı almaǵan Saýda jáne ıntegratsııa mınıstri Baqyt Sultanov pen Aýyl sharýashylyǵy mınıstri Erbol Qarashókeevke sógis jarııalaǵan edi.