Baqyt Sultanov «Amanat»-tyń qoǵamdyq qabyldaýynda azamattardyń jeke máselelerin tyńdady

NUR-SULTAN. QazAqparat - QR Premer-Mınıstriniń orynbasary – Saýda jáne ıntegratsııa mınıstri Baqyt Sultanov «Amanat» partııasynyń respýblıkalyq qoǵamdyq qabyldaýynda birqatar óńir turǵyndaryn qabyldady. QazAqparat bul týraly primeminister.kz saıtyna silteme jasap habarlaıdy.

Eki saǵattan astam ýaqytqa sozylǵan qabyldaýda Premer-Mınıstrdiń orynbasary 6 azamattyń máselesin qarady. Astana, Almaty, Qyzylorda jáne Petropavl qalalarynyń, Shyǵys Qazaqstan jáne Aqtóbe oblystarynyń turǵyndary ózderin tolǵandyratyn máselelerin jetkizdi. Kezdesýde qosylǵan qun salyǵy boıynsha tirkeý shegin tómendetýdi eskere otyryp, qoǵamdyq tamaqtaný salasyndaǵy salyq saıasaty, Kókshetaý qalasy men oblysty gazdandyrý jobasyn júzege asyrý jáne qarjylandyrý tetigin anyqtaý, sondaı-aq Almatyda Qytaıdan keletin tehnıka men qosalqy bólshekterdiń kórmesin ótkizý jáne taǵy basqa máseleler talqylandy.

Baqyt Sultanov ShQO ákimdigine Óskemen qalasy turǵyndaryna arnalǵan, jeke bıznes salyp jatqan qysqy oıyn-saýyq keshenine óndiristik ınfraqurylym júrgizý jáne elektr berý jelisin montajdaý máselesin qaraý merzimin sozbaýdy tapsyrdy.

Qarjy mınıstrligine «Amanat» partııasynyń qoǵamdyq qabyldaýlarynda qoǵamdyq tamaqtaný kásiporyndary (QR MKK) úshin salyq salý (arnaıy salyq rejımi jáne QQS boıynsha esepke qoıý) máseleleri boıynsha aýqymdy túsindirý jumystaryn júrgizýdi tapsyrdy. Sondaı-aq ol jumysqa «Atameken» UKP tartý qajettigi aıtyldy.

«Bizdiń kásipkerler QQS rejımi qoǵamdyq tamaqtaný salasynyń barlyq qatysýshylaryna áser etedi dep qaýiptenedi. Búgin Qarjy mınıstrliginen birneshe kásipker QQS-qa kóshý sharttary boıynsha tolyq túsinikteme aldy. Endi muny naryqtyń barlyq qatysýshylaryna mindetti túrde túsindirý qajet. Oǵan salalyq qaýymdastyqtaryn, birinshi kezekte meıramhana bıznesi qaýymdastyǵyn tartý qajet», — dedi B. Sultanov.

Sondaı-aq, vıtse-premer Aqtóbe ákimdigine qala turǵyny kótergen máseleni sheshý boıynsha (oryndalǵan jumystyń aktilerine qol qoıý bıýrokratııa saldarynan uzap jatyr dep shaǵymdandy) bergen tapsyrmasyn partııalyq baqylaýǵa alýǵa shaqyrdy.

Baqyt Sultanov barlyq ótinishterge tolyq jaýap berdi. «Amanat» partııasynyń qabyldaý bólmesinde kóterilgen barlyq máseleler Premer-Mınıstr orynbasarynyń jeke baqylaýyna alyndy. Jaýapty tulǵalarǵa tıisti tapsyrmalar berildi.