Baqyt Sultanov áleýmettik jelilerde belsendi bolmaq

NUR-SULTAN. QazAqparat - QR Saýda jáne ıntegratsııa mınıstri Baqyt Sultanov jaz aılarynda qandaı jumystarmen aınalysqany týraly aıtty, dep habarlaıdy QazAqparat tilshisi.

«Keıingi kezde jańa qyzmetime baılanysty kóp issaparlarǵa bardym. Jańadan qurylǵan Saýda jáne ıntegratsııa mınıstrligine qoıylǵan negizgi mindettemelerdiń biri – ol Qazaqstannyń taýarlaryn syrtqa eksporttalýyn ilgeriletý, sondaı-aq ishki naryqtaǵy saýda-sattyqtyń sapasyn arttyrý. Osy oraıda, qazaqstandyq óndirýshiler úshin kóp júrip, mańyzdy jumystar jasaıtyn bolamyz», - dedi mınıstr.

Budan bólek B. Sultanov vedomstvonyń jumys barysyn baıandaý boıynsha tilshiler qaýymymen jıi kezdesýge ýáde etti.

«Munymen qosa, áleýmettik jelilerdegi akkaýnttardyń jumysyn qaıtadan jandandyramyn dep ýáde bergim keledi. Jalpy, Memleket basshysynyń sheshimimen mınıstrlik ýaqtyly qurylyp otyr. Óıtkeni búginde syrtqy ekonomıkalarda bolyp jatqan oqıǵalarǵa baılanysty, sonyń ishinde «saýda soǵystary», ıntegratsııalardaǵy ózgeristerge oraı qazaqstandyq taýarlardyń básekege qabilettiligin arttyrý men eksportty ulǵaıtý óte ózekti. Sondyqtan mınıstrliktiń jumysynda, ózimizdiń strategııamyzda atalǵan mindettemelerge aıryqsha mán berýdemiz», - dedi Baqyt Sultanov.

Eske salsaq, bıyl maýsym aıynda QR Prezıdenti Qasym-Jomart Toqaevtyń Jarlyǵymen Baqyt Sultanov Qazaqstan Respýblıkasynyń Saýda jáne ıntegratsııa mınıstri bolyp taǵaıyndaldy.

Sonymen qatar, Memleket basshysy jańadan qurylǵan mınıstrlikke birqatar mindet júktedi.

Aıta keteıik, Álıhan Smaıylov Saýda jáne ıntegratsııa mınıstrligin qurýǵa ne túrtki bolǵanyn aıtqan edi.