Baqyt Qaıyrbekov «Qazaqfılm» kınostýdııasynyń prezıdenti bolyp taǵaıyndaldy

ASTANA. QazAqparat - Baqyt Qaıyrbekov Sháken Aımanov atyndaǵy «Qazaqfılm» kınostýdııasy prezıdenti bolyp taǵaıyndaldy. Búgin jańa qyzmetinde alǵash ret Ortalyq kommýnıkatsııalar qyzmetindegi brıfıngke qatysty.

Baqyt Qaıyrbekov - aqyn, stsenarıst, kınorejısser, 10 poetıkalyq jınaqtyń jáne kóptegen derekti fılmderdiń avtory. 1970 jyly Máskeýdegi M.Gorkıı atyndaǵy Ádebıet ınctıtýtynda oqyǵan. «Jazýshy» baspasynda, «Sovetskıı Kazahstan segodnıa», «Qazaqfılm» kınostýdııasynda, kórkem jáne televızııalyq shyǵarmashylyq birlestiginde, Qazaq KSR Mádenıet mınıstrliginiń repertýar-redaktsııalyq alqasynda, «Qazaqtelefılmde», Memlekettik qyzmetkerlerdi qaıta daıarlaý jáne biliktiligin arttyrý ınstıtýtynyń baspa ortalyǵynda jaýapty qyzmetter atqarǵan. 1979-1982 jyldary Abaı atyndaǵy Qazaq pedagogıka ınstıtýtynda aspırant, 1987-1989 jyldary KSRO Memlekettik kıno janyndaǵy stsenarıster men rejısserler joǵary kýrsynyń tyńdaýshysy bolǵan. Sh.Aımanov atyndaǵy «Qazaqfılm» kınostýdııasynda, repertýarlyq-redaktsııalyq alqada, aqparattyq-baspasózdik ortalyqta, «Gala TV» kınostýdııasynda, Qazaqstan Respýblıkasy Prezıdentiniń teleradıokesheninde qyzmet etken.

Qazaqstannyń eńbek sińirgen qaıratkeri. Táýelsizdiktiń 10 jyldyǵyna arnalǵan merekelik medalimen, «Qurmet» ordenimen marapattalǵan.

Budan buryn habarlanǵandaı, Ermek Amanshaev ótken jyldyń sońynda basqa qyzmetke aýysýyna baılanysty kınostýdııanyń basshylyǵynan ketken bolatyn. Ol Astana ákiminiń orynbasary qyzmetine taǵaıyndaldy.